24 май ҳолатига кўра бир сутка ичида коронавирус инфекцияси юқтириб олган 153 нафар киши касаллик асоратлари оқибатида ҳаётдан кўз юмди. Бу ҳақда Россия федерал тезкор штаби маълумотларига таяниб, «РБК» хабар қилган.
COVID-19’га чалинганлар орасида ўлим қайд этилгани бўйича ҳолатларнинг умумий сони 3541 тага етди. Қарийб 2 минг нафар бемор Москвада вафот этган, яна 329 киши — Москва вилоятида коронавирус инфекцияси қурбони бўлган. Ҳудудлар миқёсида учинчи ўринда Санкт-Петербург бормоқда, бу ерда 133 киши касаллик асоратлари туфайли вафот этган, тўртинчи ўринда — Доғистон республикаси (84 та ўлим ҳолати).
Россияда COVID-19 билан касалланганларнинг умумий сони 344,4 мингга етган. Ортда қолган бир сутка давомида 8,5 мингта янги касалланиш ҳолати қайд этилган.
Россияда охирги марта коронавирус инфекцияси оқибатидаги ўлим кўрсаткичи бўйича рекорд 22 май куни кузатилган ва шу куни 150 киши COVID-19 сабаб ҳаётдан кўз юмганди.
22 май куни Роспoтребнадзор раҳбари Анна Попова коронавирус эпидемиясининг чўққиси ортда қолаётганини маълум қилган. Унинг сўзларига кўра, эпидемия чўққисига чиққан вақтда мамлакатдаги касалланиш кўрсаткичи бутун дунёда энг паст натижани кўрсатган ва ҳозир ҳам Россияда бу борада пасайиш қайд этилмоқда. Суткалик ўсиш кўрсаткичи охирги 10 кун давомида пасайиб бормоқда, деган Попова.
Мавзуга доир:
Изоҳ (0)