Чикагодаги ўзбеклар Рамазон ҳайитини қандай нишонлади? (фото)

2020 йилги Рамазон ҳайити байрами карантин пайтига тўғри келди. Барча оммавий одамлар тўпланадиган жойлар, шу жумладан масжидлар ҳам ёпилган. Одамларга тиббий ниқобда ва ўзаро масофа сақлаган ҳолда юриш тавсия этилган.

«Sof.uz» Чикагодаги Ўзбек-Америка ассоциацияси президенти Олим Шариповга таяниб карантин ҳолатида бўлган АҚШнинг Иллинойс штати, Чикаго шаҳридаги ўзбеклар Рамазон ҳайитини қандай кутиб олгани ҳақида фотожамланма тақдим этди.

Маълум қилинишича, ҳар бир оила ўзларининг машиналарида алоҳида бўлиб бир жойга тўпланган ва у ердан машиналар безатилиб, колонна бўлиб Чикагонинг биринчи ўзбек фуқароси (1970 йилдан), Чикаго Ўзбек-Америка ассоциацияси асосчиси Сирожиддин ҳожи Насафийнинг ҳовлиси томон йўл олган. 77 ёшли Ҳожи ота болажонларга ташқаридан туриб байрам совғаси улашган.

Шундан кейин, машиналар колоннаси (20 тадан ошиқ машина) Чикаго шаҳар маркази (Down Town) ва Мичиган кўли томон йўл олган. Олим Шариповнинг таъкидлашича, байрам жуда сермазмун, айниқса болажонлар учун эсда қоларлик бўлиб ўтди.

Қайд этилишича, ушбу тадбир Чикагодаги Ўзбек-Америка ассоциацияси томонидан амалга оширилди.