Ҳиндистонда коронавирус инфекциясини юқтириб олиш бўйича ҳолатлар сони бир сутка ичида 6,7 мингтага кўпайди ва касалланганларнинг умумий сони 131 868 нафарга етди. Бу ҳақда мамлакат соғлиқни сақлаш ва оилавий хотиржамлик вазирлиги ахборотига таяниб «РИА Новости» хабар қилган.
Бир кун аввал касалланганларнинг умумий сони 125 101 нафарни, ундан олдин эса 118 447 нафарни ташкил қилган.
Вазирлик берган маълумотга асосан Ҳиндистонда 73 560 киши касалликдан даволанмоқда. 54 440 нафар бемор (бир сутка ичида 2 657 киши) COVID-19’дан тузалган, 3867 нафар одам (бир сутка ичида 1437 киши) эса касалликдан вафот этган.
Ҳиндистонда эпидемиядан энг кўп зарар кўрган ҳудуд мамлакат марказидаги Махараштра штати бўлиб турибди, бу ерда 47 190 та касалланиш ҳолати кузатилган (бир суткада 2607 та қўшилди). Иккинчи ўринда Тамилнад штати бормоқда – 15 512 нафар бемор (бир сутка давомида 759 нафар одам қўшилди). Коронавирусга чалинган одамлар сони бўйича 3-ўринда Ҳиндистоннинг энг ғарбий штати Гужорот бормоқда: касалланганларнинг умумий сони 13 664 нафар, бир сутка ичида 396 та янги ҳолат қайд этилган.
Аввал Ҳиндистон ички ишлар вазирлиги 25 мартдан бери амалда бўлиб турган «ўзини яккалаш» режимини 31 майгача узайтирган ва штатларга коронавирус билан касалланиш ҳолатларининг сонига қараб ҳудудларни «қизил», «тўқ сариқ» ва «яшил» тоифаларга ажратиш бўйича топшириқ берганди. «Яшил» ва «тўқ сариқ» ҳудудларда такси ва жамоат транспортининг ҳаракатланишига рухсат берилади, заводлар ва алоҳида дўконлар очилади. Ҳукумат ички ва халқаро авиақатновларга қўйилган тақиқни узайтирган. Шунингдек, изоляция режими даврида мактаблар, университетлар, меҳмонхоналар, катта савдо марказлари ва ресторанлар фаолияти вақтинча тўхтатилган. Оммавий тадбирлар, хусусан, диний маросимлар ўтказилиши тақиқланган. Спорт комплекслари ва стадионларни очишга рухсат берилган, бироқ томошабинлар киришига рухсат йўқ. Соат 07:00 дан 19:00 оралиғида амал қилувчи комендантлик соати ҳам узайтирилган.
Изоҳ (0)