АҚШ ҳукумати 1992 йилдан бери биринчи бор ядровий синовни ўтказиш имкониятини муҳокама қилди

АҚШ ҳукумати 1992 йилдан буён биринчи марта ядровий синовни ўтказиш имкониятини муҳокама қилди, деб хабар беради The Washington Post.

Маълумотларга кўра, ушбу масала 22 май, жума куни миллий хавфсизлик билан шуғулланувчи америкалик амалдорлар билан бўлиб ўтган учрашувда кўтарилган. Синовни ўтказиш бўйича келишувга эришилмаган. Амалдорлардан бирининг нашрга маълум қилишича, муҳокама давом этмоқда.

Яна бир манбанинг сўзларига кўра, Хитой ва Россиядан келаётган хавфларга қарши жавоб бериш учун бошқа чораларни кўриш, бироқ ядровий синовларни қайта тикламаслик қарори қабул қилинган. Оқ уй қошидаги Миллий хавфсизлик кенгаши ушбу маълумотга изоҳ беришдан бош тортган.

Администрациянинг юқори амалдорларидан бирининг сўзларига кўра, Москва ва Пекинга АҚШ «тезкор синовни» ўтказа олишини кўрсатиб қўйиши, мамлакатга қуролланиш устидан назоратни ўтказиш музокараларида ёрдам бериши мумкин. Вашингтон ушбу музокараларга нафақат Россияни, балки Хитойни ҳам жалб этиш ниятида. Таъкидланишича, учрашув давомида ядровий синовни ўтказиш борасида жиддий қарама-қарши фикрлар билдирилган.

The Washington Post’нинг ёзишича, ядровий синовларнинг қайта тикланиши беқарорлаштирувчи оқибатларга олиб келиши мумкин. «Бу ядровий қуролга эга бошқа мамлакат учун ҳам шу каби йўлдан юриш таклифига айланиб қолади. Бу мисли кўрилмаган қуролланиш пойгаси учун энг муҳим баҳонага айланиши мумкин. Бу ҳатто КХДР етакчиси Ким Чен Ин билан музокараларга ҳам путур етказади», — дейди Америка қуролланиш устидан назорат ассоциацияси раҳбари Дэрил Кимболл.