Франция ҳукумати коронавирус сабаб бекор қилинган диний маросимларни қайта йўлга қўйиш бўйича конфессиялар (диндорлар иттифоқи) билан келишиб олди. Бунда оралиқ масофа бир метр сақланиши, барча ниқоб тақиши ва қўлни дезинфекциялаши керак. Бу ҳақда мамлакат ИИВ раҳбари Кристоф Кастанерга таяниб, «РИА Новости» хабар берди.
Вазирлик ўзининг сайтида Кастанер конфессия вакиллари билан диний маросимларни қайта йўлга қўйиш шартлари ва санитария хавфсизлик чоралари борасида келишиб олганини маълум қилган. Таъкидланишича, бу борадаги тегишли қарор яқин соатларда эълон қилинади ва дарҳол кучга киради.
«Ибодат жойлари бошқа жамоат жойлари каби ‘тўсиқ’ларга (касалланишдан ҳимояланиш чоралари — таҳр.) эга бўлиши, шунингдек, жисмоний масофаланиш чораларига риоя қилиниши керак. Ушбу талабларнинг бажарилишига ибодат жойининг бошлиғи жавобгар ҳисобланади», — дейилади хабарда.
Ташкилотчилар одамлар орасида камида бир метр масофаланиш бўлишини таъминлаши керак. «Диний маросимлар вақтида ҳимоя ниқобини тақиш мажбурий», — дея таъкидланади хабарда.
Асосий эътибор биноларнинг кириш ва чиқиш қисмига қаратилади. Диний ташкилотлар одамлар оқимини назорат қилиш, шунингдек, бино ичида тўпланишларга йўл қўймадиган масъул шахсларни танлаб олиши керак.
Бу каби қоидаларга риоя қилинмаган ҳолда префектлар департаменти ибодат жойларининг очилишини тақиқлаши ёки ёпиб қўйиши мумкин.
Сўнгги маълумотларга кўра, Францияда коронавирусга чалинганлар сони 182 015 кишига етган, 28 218 бемор вирус қурбонига айланган.
Изоҳ (0)