AQSh hukumati 1992-yildan beri birinchi bor yadroviy sinovni o‘tkazish imkoniyatini muhokama qildi

AQSh hukumati 1992-yildan buyon birinchi marta yadroviy sinovni o‘tkazish imkoniyatini muhokama qildi, deb xabar beradi The Washington Post.

Ma’lumotlarga ko‘ra, ushbu masala 22-may, juma kuni milliy xavfsizlik bilan shug‘ullanuvchi amerikalik amaldorlar bilan bo‘lib o‘tgan uchrashuvda ko‘tarilgan. Sinovni o‘tkazish bo‘yicha kelishuvga erishilmagan. Amaldorlardan birining nashrga ma’lum qilishicha, muhokama davom etmoqda.

Yana bir manbaning so‘zlariga ko‘ra, Xitoy va Rossiyadan kelayotgan xavflarga qarshi javob berish uchun boshqa choralarni ko‘rish, biroq yadroviy sinovlarni qayta tiklamaslik qarori qabul qilingan. Oq uy qoshidagi Milliy xavfsizlik kengashi ushbu ma’lumotga izoh berishdan bosh tortgan.

Administratsiyaning yuqori amaldorlaridan birining so‘zlariga ko‘ra, Moskva va Pekinga AQSh “tezkor sinovni” o‘tkaza olishini ko‘rsatib qo‘yishi, mamlakatga qurollanish ustidan nazoratni o‘tkazish muzokaralarida yordam berishi mumkin. Vashington ushbu muzokaralarga nafaqat Rossiyani, balki Xitoyni ham jalb etish niyatida. Ta’kidlanishicha, uchrashuv davomida yadroviy sinovni o‘tkazish borasida jiddiy qarama-qarshi fikrlar bildirilgan.

The Washington Post’ning yozishicha, yadroviy sinovlarning qayta tiklanishi beqarorlashtiruvchi oqibatlarga olib kelishi mumkin. “Bu yadroviy qurolga ega boshqa mamlakat uchun ham shu kabi yo‘ldan yurish taklifiga aylanib qoladi. Bu misli ko‘rilmagan qurollanish poygasi uchun eng muhim bahonaga aylanishi mumkin. Bu hatto KXDR yetakchisi Kim Chen In bilan muzokaralarga ham putur yetkazadi”, — deydi Amerika qurollanish ustidan nazorat assotsiatsiyasi rahbari Deril Kimboll.