Олий Мажлис Сенати раиси Танзила Норбоева 21 май куни Самарқанд вилояти Каттақўрғон шаҳрига ташриф буюрди. Турли вазирлик ва идоралар раҳбарларидан иборат 33 нафар ишчи гуруҳ аъзолари томонидан объектлар ўрганилди. Бу ҳақда Сенат ахборот хизмати хабар берди.
Сенат раиси ишчи гуруҳ томонидан ўрганилган объектларда бўлди. Жумладан, Каттақўрғон шаҳар ҳокими Гавҳар Алимова Ўзбекистон Президенти билан бўлган мулоқотда шаҳарда иккита институт ташкил этиш таклифини илгари сурган эди.
Хусусан, Самарқанд давлат университетининг педагогика институти филиали учун замонавий талабларга жавоб берадиган ўқув корпуси, кутубхона, талабалар турар жойи ва спорт майдончасидан иборат собиқ академик лицей биноси тавсия этилган. Бундан ташқари, транспорт коллежи ўрнида Тошкент автомобиль йўллари институтининг Самарқанд филиалини ташкил этилиши мўлжалланган.
Танзила Норбоева ташриф чоғида ушбу лойиҳалар билан танишди. Бўлажак институтларнинг кадрлар салоҳияти ва талабаларни қамраб олиш имконияти билан қизиқди.
Шундан сўнг Сенат раиси шаҳардаги «Ёғ-мой» акциядорлик жамиятида бўлди. Шу ернинг ўзида корхонанинг ишлаб чиқариш қуввати ва фойдаланиш имкониятлари тўғрисида маълумот берилди. Ишлаб чиқилган дастурга биноан ушбу аксионерлик жамиятига туташ бўш ер майдонида кичик саноат зонаси бунёд этиш режалаштирилган.
Қайд этилишича, тумандаги Давлатобод кўчасидаги айни дамда мавжуд уйлар ўтган асрнинг ўрталарида қурилган бўлиб, бугунги кун талабларига жавоб бермайди. Шу боис ушбу ҳудудда замонавий кўп қаватли уйлар қад ростлаши мўлжалланган бўлиб, Давлатобод кўчаси атрофида қуриладиган кўп қаватли уйлар режа-лойиҳаси тақдим қилинди.
Ташриф мобайнида Танзила Норбоева аҳоли, хусусан, тадбиркорлар мурожаатларига эътибор қаратиб, ишбилармонлар томонидан тақдим қилинган 100 дан ортиқ лойиҳа билан танишди. Тадбиркорларнинг муаммоларини бартараф этиш мақсадида уларни банклар раҳбарияти билан учрашувини ҳам ташкил қилди.
Эслатиб ўтамиз, 13 май куни Президент Шавкат Мирзиёев раислигида ўтказилган видеоселектор йиғилишида Каттақўрғон шаҳрини ҳам ривожлантирилишга алоҳида тўхталиб, вазифалар белгиланган эди. Бунда асосий эътибор Каттақўрғон ва Нуробод туманларидаги 1200 гектар лалми ва яйлов ерларни Каттақўрғон шаҳри аҳолисига фойдаланишга бериш орқали 5 минг кишини иш билан таъминлаш вазифаси қўйилганди.
Аввалроқ Самарқанд шаҳрини Пастдарғом, Нуробод, Самарқанд туманлари ҳисобига кенгайтириш режалаштирилаётгани ҳақида хабар берилганди.
Изоҳ (0)