Қашқадарё вилояти Қамаши туманида Бош прокуратура ҳузуридаги департаментнинг туман бўлими, вилоят ИИБ ва Давлат солиқ инспекцияси ходимлари томонидан ўтказилган тезкор тадбирда ҳеч қандай ҳужжатларсиз 32 тонна унни қайта сотиш мақсадида сақлаб турган тадбиркорлар аниқланди. Бу ҳақда Бош прокуратура матбуот хизмати «Дарё»га маълум қилди.
Тумандаги «Е-Инвест» МЧЖнинг тадбиркорликка оид ҳуқуқларини ҳимоя қилиш борасида ўтказилган тезкор тадбирда фуқаро И.Ғ. ўз уйида ҳеч қандай ҳужжатларсиз «Яккабоғ Дон» филиалида ишлаб чиқарилган 11,3 тонна 1-навли ҳамда Қозоғистонда ишлаб чиқарилган 20,7 тонна унни қайта сотиш мақсадида сақлаб тургани аниқланган.
Шунингдек, тадбир давомида фуқаро М.Ш. ва бошқалар 6 май куни «Е-Инвест» МЧЖ томонидан берилган ишончномага асосан «Яккабоғ Дон» филиалидан олинган 34,8 миллион сўмлик 14 тонна унни жамиятга эмас, И.Ғ.нинг уйига олиб бориб, унга ҳар бир қопини 150 минг сўмдан ҳисоблаб, 42 миллион сўмга сотиб юборган. Бу орқали улар ўзига ишониб топширилган ўзганинг мулкини ўзлаштириш йўли билан талон-торож қилган.
Мазкур ҳолат юзасидан фуқаро М.Ш.,«Яккабоғ Дон» филиали моддий жавобгар шахслари ва бошқаларга нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.
Мавзуга доир:
Изоҳ (0)