Ўзбекистон Президент Шавкат Мирзиёев Андижон вилоятига ташрифи давомида Андижон шаҳридаги «ВБМ Текстиль Груп» масъулияти чекланган жамият фаолияти билан танишди. Бу ҳақда Президент матбуот хизмати хабар берди.
Маълум қилинишича, корхона биноси қарийб 13 йил қаровсиз ётган. Бино тадбиркорга «ноль» қийматда берилгач, вазият тамомила ўзгарди. 6,5 миллион доллар маблағ эвазига қурилиш-таъмирлаш ишлари амалга оширилиб, АҚШ, Италия, Япониядан тикувчилик ва матога ишлов бериш дастгоҳлари келтириб ўрнатилди.
Таъкидланишича, замонавий қиёфа касб этган корхона ўн кун аввал фаолият бошлаган. Бу ерда йилига ўртача 11 миллион дона тайёр трикотаж маҳсулотлари ишлаб чиқарилади.
МДҲ мамлакатлари билан шартномалар имзоланган бўлиб, йилига 27 миллион долларлик маҳсулот экспорт қилиш мўлжалланган. Бу географияни кенгайтириш мақсадида Европа Иттифоқи давлатлари билан музокаралар олиб борилмоқда.
Корхонада 1200 нафар аёл иш билан таъминланди. Давлат раҳбари улар билан суҳбатлашди.
«Авваламбор, сизларни яқинлашиб келаётган улуғ айём билан табриклайман. Бу фабрика андижонликларга ўзига хос туҳфа бўлибди. Биз учун ҳар бир иш ўрни муҳим. Бу ерда шунча хотин-қиз ишли бўлганидан жуда хурсандман. Тадбиркорларимиз жаҳон бозорларига чиқмоқда. Бу — дунёқараш ўзгариши, имкониятлар натижаси», — деди Президент.
Мутасаддиларга пахта толасини қайта ишлашни чуқурлаштириб, қўшилган қиймат яратиш, корхоналарга қўшимча инвестициялар йўналтириб, ишлаб чиқаришнинг тўлиқ циклини ўзлаштиришга кўмаклашиш бўйича топшириқлар берилди.
Қайд этилишича, илгари вилоятда етиштирилган пахта фақат хом ашё сифатида сотиларди. Бундан даромад 100 миллион долларга ҳам етмасди. Эндиликда қайта ишлаш ривожланаётгани натижасида жорий йилда қарийб 440 миллион долларлик маҳсулот экспорт қилинади. 2021 йилда бу кўрсаткични 527 миллион долларга етказиш режалаштирилган.
«ВБМ Текстиль Груп» томонидан Андижонда тикувчилик ва жинси ишлаб чиқариш, мато тўқиш ва бўяш корхоналари ташкил этилиши кўзда тутилган.
Шу ерда 2020—2021 йиллар мобайнида вилоятда амалга ошириладиган инвестиция лойиҳалари ҳақида маълумот берилди.
Изоҳ (0)