« ‘Давлат божи тўғрисида’ги қонунга ўзгартиш ва қўшимчалар киритиш ҳақида»ги қонун Президент томонидан имзоланди. Бу ҳақда «Ҳуқуқий ахборот» канали хабар берди.
Киритилган ўзгартишларга кўра, Ўзбекистонда доимий яшовчи ва республиканинг бошқа минтақаларида доимий пропискага эга бўлган Ўзбекистон фуқаролари томонидан Тошкент шаҳри ва Тошкент вилоятида янги қурилган кўчмас мулк сотиб олинганда мол-мулкнинг олди-сотди шартномаларини тасдиқлаганлик учун шартнома суммасининг 5 фоизи миқдордаги давлат божининг алоҳида ставкаси чиқариб ташланди.
21 апрель куни Шавкат Мирзиёев Тошкент шаҳри ва Тошкент вилоятига доимий прописка қилиш тизимини такомиллаштириш тўғрисидаги ҳужжатни имзолаган эди. Президент фармонига мувофиқ бундан буён ишдан бўшатилган ва Тошкент шаҳрида доимий рўйхатга қўйилиш юзасидан махсус рўйхат асосида пропискага қўйилган ходимнинг пропискаси «куйиб кетмайди».
Эслатиб ўтамиз, Президент Шавкат Мирзиёев 24 январь куни Олий Мажлисга йўллаган мурожаатномасида ҳукумат 1 апрелга қадар прописка тизимини ислоҳ қилишни назарда тутувчи таклифларни ишлаб чиқиши лозимлигини таъкидлаганди.
Изоҳ (0)