Ўзбекистонликлар карантин нормаларига риоя этган ҳолда яшашни ва ишлашни ўрганиши керак, бу фақат фойдага хизмат қилади. Бу ҳақда Президент Шавкат Мирзиёев 19 май куни бўлиб ўтган видеоселектор йиғилишида айтиб ўтди.
«Яна бир марта қайтараман — карантин даврида яшаш ва ишлашга ўрганишимиз керак. Карантин нормаларига риоя этиш керак, маскаларни ечишга ҳали ҳеч ким рухсат бергани йўқ. Жамоат транспорти фаолиятига рухсат бермаяпмиз. Ҳали хавф-хатар жуда катта», — деди давлат раҳбари.
«Давлат чораларни кўрмаса, натижа бўлмайди — мана шуни ҳамма билиши керак. Карантин нормаларига риоя этиб, иқтисодиётни тиклаш керак деган вазифа қўйиляпти. Бу шароитда яшашни ҳам, ишлашни ҳам ўрганишимиз керак. Бу фақат бизга фойда бўлади», — дея қўшимча қилди Шавкат Мирзиёев.
Маълумот учун, Ўзбекистонда карантин тартиби босқичма-босқич юмшатиб борилмоқда. Хусусан, эпидемиологик вазиятдан келиб чиқиб, ҳудудлар «яшил», «сариқ» ва «қизил»га ажратиб чиқилган. «Сариқ» ҳудудларда, жумладан, соат 06:00 дан 22:00 га қадар, «яшил» ҳудудларда эса хоҳлаган вақтда шахсий автомобилдан махсус стикерсиз фойдаланиш мумкин. Айни вақтда Президент карантин ҳали тугамаганини эслатиб ўтган.
Эслатиб ўтамиз, 19 майдаги видеоселектор йиғилишида ўзини ўзи банд қилган 60 дан зиёд касб эгалари даромад солиғидан озод қилиниши эълон қилинган эди. Бундан ташқари, Президент тадбиркорларнинг мулк ҳуқуқи масаласида ҳокимларга огоҳлантириш бериб, Марказий банкга кредитлаш шартларини соддалаштириш бўйича топшириқ берган эди.
Изоҳ (0)