«Ўзбекистон Қозоғистонга зиён етказмаслик учун барча чораларни кўрди». Сув хўжалиги вазири ўринбосари Сардобадаги фалокат ҳақида

Ўзбекистон ҳақиқатан ҳам Сардоба сув омбори тўғонининг ёрилиши оқибатида тошган сув Қозоғистонга етиб бормаслигини маълум қилган. Бу ҳақда Сув хўжалиги вазири ўринбосари Воҳиджон Аҳмаджоновга таяниб, «Gazeta.uz» хабар берди.

Май ойининг бошида Қозоғистон экология, геология ва табиий ресурслар вазирининг ўринбосари Сергей Громов Ўзбекистон томони «бир томчи сув ҳам Қозоғистонга ўтмаслигини» таъкидлагани ҳақида гапирган эди.

«1 май куни сув хўжалиги вазири ўринбосари билан гаплашдим. У вазирнинг топшириғига кўра, ‘тўғон ёрилди, бироқ сизлар хавотир олманглар, Қозоғистон томонига бир томчи ҳам сув ўтмайди’ деди. Биз шунга қарамай керакли чораларни кўриб қўйдик», — деганди Громов.

Воҳиджон Аҳмаджоновнинг сўзларига кўра, тўғон ёрилганининг дастлабки дақиқаларида Қозоғистон Ўзбекистонда бу борада маълумот сўраган. Бунга жавобан ўзбек томони содир бўлган воқеанинг дастлабки ҳисоб-китобларига кўра, сув омбори беркитилиши, сув оқими эса хавфсиз жойга йўналтирилишини маълум қилган.

«Бу дастлабки маълумот эди. Ҳар қандай офатнинг кўламини фавқулодда аниқлаш қийин. Биринчидан, сув тошқинидан сўнг воқеа жойига етиб бориш имкони йўқ ёки яхшилаб ўрганиб, вазиятга тўлақонли баҳо бера олмайсиз. Дастлабки ҳисоб-китобларда ҳеч ким сув омборидан бу қадар кўп сув оқиб кетишини кутмаган эди. Шундан келиб чиқиб, ростан ҳам Қозоғистон томонига сув омбори зудлик билан ёпилиши ва сув оқими бошқа томонга йўналтирилиши айтилганди», — дейди вазир ўринбосари.

Сув хўжалиги вазирининг ўринбосари техноген авария кўлами ва унинг оқибатларини олдиндан айтиб бўлмаслигини билдирган.

«Қозоғистон томонидан сўров бўлгач, дастлабки дақиқаларда ростан ҳам шунақа жавоб бўлди. Сув уларга етиб бормаслиги ва зиён етказмаслиги учун барча чоралар кўрилаётгани айтилди», — дея тасдиқлайди Аҳмаджонов.

1 май куни Ўзбекистон ФВВ фалокат оқибатларини бартараф этиш учун сув оқими Жиззах вилоятидаги Арнасой кўлига йўналтирилганини маълум қилганди. Сув хўжалиги вазири ўринбосарининг таъкидлашича, ушбу чора сув тошқинининг олдини олишга ёрдам бермаган.

«Ушбу ҳудудда ортиқча сувни чиқариб юборишга мўлжалланган асосий артерия — Жанубий Мирзачўл магистрал канали. Рельефга кўра, коллектор энг қуйи нуқтада қурилган. Барча сув шу ердан чиқариб юборилади. Бироқ ҳар бир каналнинг ўтказувчанлик қобилияти бор. Ушбу каналда эса сониясига 120 метр куб. Ўша куни сув оқимининг тезлиги 300 метр кубга етди, яъни каналнинг ўтказувчанлик қобилиятидан 2-3 баробарга кўп», — дейди вазир ўринбосари.

Воҳиджон Аҳмаджоновнинг таъкидлашича, Ўзбекистон Қозоғистонда зарар етмаслиги учун барча чораларни кўрган.

Эслатиб ўтамиз, 1 май куни эрта тонгда Сирдарё вилоятидаги Сардоба сув омбори тўғонларидан бири ёрилиб кетган эди. Вилоятдаги бир неча қишлоқ, шу жумладан, Қозоғистон жанубидаги ҳудуд сув остида қолди. Икки мамлакатда умумий ҳисобда 120 мингдан ортиқ аҳоли эвакуация қилинди.

Ўзбекистон Президенти Шавкат Мирзиёев Сардобадаги техноген офат туфайли Қозоғистоннинг жанубий қисмидаги ҳудудлар ҳам зарар кўргани, Ўзбекистон ҳукумати мазкур офат оқибатларини бартараф этиш бўйича қўшни давлат билан яқиндан ҳамкорлик қилишини айтиб ўтганди.