Ҳабиб Нурмагомедов MMA рейтингида етакчиликни сақлаб қолди

ESPN аралаш жанглар (MMA) яккакурашчиларининг янгиланган рейтингини эълон қилди.

Аввалги ой билан солиштирганда рўйхатнинг кучли бешлигида ўзгариш содир бўлмаган. Биринчи ўринда енгил вазн тоифасида UFC чемпиони Ҳабиб Нурмагомедов бормоқда. Ярим оғир вазн чемпиони Жон Жонс эса иккинчи ўринни банд этган бўлса, мутлақ енгил вазн чемпиони Генри Сеҳудо учинчи поғонадан жой олган. Оғир вазн тоифаси вакиллари Стипе Миочич ва Даниэль Корме кучли бешликдан ўрин олган.

6—10-ўринларни қуйидаги жангчилар эгаллаган: Исраэл Адесаня, Камару Усмон, Деметриус Жонсон, Александр Волкановски ва Жастин Гетжи. Уларнинг барчаси март ойига нисбатан биттадан ўрин кўтарилишга муваффақ бўлган.

31 ёшли Нурмагомедов MMA’даги 28 жангда 28 ғалабага эришган. Россиялик яккакурашчи 2020 йилнинг сентябрь ойида енгил вазн тоифаси вақтинчалик чемпиони Жастин Гетжи қарши жанг қилиши кутилмоқда.

Эслатиб ўтамиз, UFC умумий рейтингида биринчи ўрин Жон Жонсга тегишли, кейинги ўринлардан Нурмагомедов ва Сеҳудо жой олган.

Ҳабиб Нурмагомедов ҳам мағлубиятга учраган, фақат MMA’да эмас (видео).