Алекс Сонг «Барселона»га ўтгани ҳақида: «У ерга ўтишимдан олдин миллионерга айланишимни билар эдим»

«Барселона» собиқ ярим ҳимоячиси Алекс Сонг 2012 йилда каталон клубига пул туфайли ўтганини маълум қилди.

«Кўплаб футбочилар маошга қараб қолган эмас. Мен «Арсенал»да саккиз йил тўп сурдим, бироқ фақат сўнгги тўрт йилда яхши пул топишни бошладим. Маош ошди, шунингдек, пулни тўғри ишлатишни ўргандим.

«Арсенал»га келган вақтим ҳафтасига 15 минг фунт маош олардим. Ёш йигит учун бу ҳайратланарли пул эди. Энг қиммат дўконларга боришим ва ақл бовар қилмас кечаларда иштирок этишим мумкин эди.

Бир куни машғулотга келдим ва Тьерри Анри ўзининг ажойиб автомобилида ташриф буюрганини кўрдим. Ўша вақтда нима қилиб бўлса ҳам шу автомобилдан сотиб олишга аҳд қилдим. Автосалонга бордим, керакли ҳужжатларни имзоладим ва қирол Анриникидек автомобилга эга бўлдим. Бироқ қасам ичаман, икки ой ўтиб уни қайтариб бердим. Ҳамма пулим ёқилғи қуйишга кетарди. Уларга қарата шундай дедим: «Менга Toyota беринг, бу автомобиль менга жуда қимматлик қилди». Машғулот пайтида Анри савол берди: «Йигитча, машинанг қани?». Унга бу машина мен учун жуда ҳашаматли бўлганлигини айтдим.

Барча мени миллионер деб ўйласа ҳам «Арсенал»да ўйнаб юрган вақтим ҳатто 100 минг фунт ҳам йиға олмасдим. «Барселона» менга шартнома таклиф қилганида рақамларни кўриб, узоқ ўйлаб ўтирмадим. Фаолиятим якунлангач оилам камчиликсиз яшашини истардим. «Барселона» спорт директори ўйин амалиёти етарли бўлмаслиги ҳақида огоҳлантирди, бироқ менга бунинг фарқи йўқ эди. Миллионерга айланганимни билиб турардим», — дейди Сонг.

Алекс Сонг 2012—2016 йиллар оралиғида «Барселона»да тўп сурган, мазкур муддатнинг бир ярим мавсумини футболчи «Вест Ҳэм»да ижарада ўтказган. Ҳозирда 32 ёшли футболчи эркин агент мақомига эга. Аввалроқ у «Сьон» билан амалдаги шартномасини бекор қилганди.