Италия бош вазири Жузеппе Конте 14 июнга қадар мамлакатда спорт тадбирларини ўтказишни тақиқлаш тўғрисидаги қарорни имзолади.
Sport Mediaset нашрининг хабар қилишича, мазкур қарор коронавируснинг тарқалиш динамикасига қараб қайта кўриб чиқилиши мумкин. Шу тариқа А Серияда жорий мавсумини қайта бошлаш санаси камида бир ҳафта суриладиган бўлди. Италия чемпионатини 13 июндан давом эттириш режалаштирилганди.
Аввалроқ Италия спорт вазири Винченцо Спадафора тиббиёт протоколи тайёр бўлмагани сабаб жамоавий машғулотларни бошлаш санаси кейинга қолдирилганини маълум қилганди. Ҳужжат имзоланмагунига қадар футболчилар клуб базаларида индивидуал машғулот ўтаб туради.
Дастлаб тақдим этилган тиббиёт протоколига А Сериянинг камида 9 та клуби қарши чиққан. Унга кўра, бир нафар футболчида коронавирус аниқланадиган бўлса, клубнинг барча аъзолари карантинга юборилиши ҳақидаги банд бор эди. Бу эса клубларга маъқул келмаган.
Мавзуга доир: Англия Премьер Лигаси клубларига 19 майдан гуруҳ бўлиб машғулотларни бошлашга рухсат берилди
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)