«Челси» Жоржиньонинг нархини эълон қилди. Унга «Ювентус»дан таклиф бор

«Челси» раҳбарияти жамоа ярим ҳимоячиси Жоржиньо трансфери борасидаги таклифларни кўриб чиқишга тайёр.

Tuttosport’нинг хабар қилишича, лондонликлар 28 ёшли ўйинчини 65-70 миллион еврога баҳоламоқда. Италиялик футболчининг хизматларига «Ювентус»дан қизиқиш бор. Туринликлар устози Маурицио Сарри аввалроқ Жоржиньо билан «Наполи» ва «Челси»да бирга ишлаган. «Кўклар» айнан Саррининг талаби билан 2018 йилда футболчини сотиб олганди.

«Челси» бош мураббийи Фрэнк Лэмпард Жоржиньони жамоада олиб қолишни истамоқда, бироқ ярим ҳимоячининг ўзи «Ювентус»га ўтиш ниятида.

Жоржиньонинг «Челси» билан амалдаги шартномаси 2023 йилнинг ёзига қадар мўлжалланган. Transfermarkt’га кўра, футболчининг нархи 52 миллион еврога тенг.

Жорий мавсум Жоржиньо клуб миқёсида 37 ўйин ўтказиб, еттита гол ва иккита самарали узатма муаллифига айланди.