Енгил вазн тоифасида UFC чемпиони Ҳабиб Нурмагомедовнинг менежери Али Абдулазиз россиялик яккакурашчи ҳар бир жангдан сўнг фаолиятини якунлаш ҳақида ўйлашини маълум қилди.
«Ҳабиб ҳар бир жангдан сўнг фаолиятини якунлмоқчилигини айтади. Икки ҳафта ўтганидан кейин эса у менга қўнғироқ қилади ва кейинги беллашувда ким билан жанг қилиши борасида маслаҳат сўрайди», — дейди Абдулазиз.
Эслатиб ўтамиз, Ҳабиб Нурмагомедов кейинги жангини 2020 йилнинг кузида ўтказиши тахмин қилинмоқда. Унинг рақиби енгил вазн тоифаси вақтинчалик чемпиони Жастин Гетжи бўлади. Гетжи 10 май куни бўлиб ўтган UFC 249 мусобақасида Тони Фергюсонни нокаутга учратганди.
Аввалига Нурмагомедов апрель ойида Фергюсонга қарши жанг ўтказиши режа қилинганди. Бироқ коронавирус пандемияси сабаб мазкур қарама-қаршилик бешинчи марта бекор бўлди.
Маълумот учун, Ҳабиб MMA’даги фаолияти давомида 28 та жанг ўтказиб, уларнинг барчасида ғалаба қозонган. У ўзининг сўнгги жангини 2019 йилнинг 7 сентябрида Дастин Порьега қарши ўтказиб, рақибини муддатидан аввал таслим қилганди.
Изоҳ (0)