Коронавирус сабабли Ўзбекистонда 2020 йилда олий ва ўрта махсус диний таълим муассасаларида абитуриентларнинг ҳужжатларини қабул қилиш онлайн шаклда амалга оширилади, кириш имтиҳонлари эса соддалаштирилади. Бу ҳақда Ўзбекистон мусулмонлари идораси маълум қилди.
Қайд этилишича, олий ва ўрта махсус диний таълим муассасаларида тасдиқланган қабул низомига кўра, ўрта махсус ислом таълим муассасаларида абитуриентлардан ҳужжат қабул қилиш 15 июндан 5 июлгача, олий диний таълим муассасаларида эса 15 июндан 15 июлгача ўтказилиши белгиланган.
Ҳозирги вазиятдан келиб чиқиб, коронавирус касаллиги тарқалишининг олдини олиш мақсадида диний таълим муассасаларида 2020/2021-ўқув йили учун абитуриентлардан ҳужжатларни қабул қилиш юқорида қайд этилган муддатларда онлайн шаклда амалга оширилиши режалаштирилмоқда.
Маълум қилинишича, ўтган йилларда қабул имтиҳонлари ўрта махсус ислом таълим муассасаларида учта фан — чет тили, тарих, маънавият ва маърифат бўйича тест синови шаклида ўтказилган. Тошкент ислом институти ва Мир Араб олий мадрасасида араб тили фани бўйича ижодий имтиҳон, фиқҳ ва ақоид, Ўзбекистон тарихи фанлари бўйича тест синови бўлиб ўтган. Ҳадис илми мактабида ҳадис ва мусталаҳул ҳадис, араб тили фани бўйича ижодий имтиҳон, Ўзбекистон тарихи фанидан тест синови ўтказилган.
Мамлакатда карантин тартиблари давом этаётгани ва абитуриентларга қулайликлар яратиш мақсадида, 2020/2021-ўқув йили учун диний таълим муассасаларига кириш тест имтиҳонлари фанларни истисно тариқасида қисқартириш бўйича таклифлар ҳам кўриб чиқилмоқда.
Ўзбекистон мусулмонлари идораси томонидан таъкидланишича, ўрта махсус ислом таълим муассасаларига умумий ўрта таълим (11-синф негизида) ёки ўрта махсус, касб-ҳунар таълим муассасасини тугатганлиги ҳақида ҳужжат (диплом)га эга бўлган фуқаролар, олий диний таълим муассасаларига эса ўрта махсус ислом таълим муассасаларини тамомлаган битирувчилар қабул қилинади.
Қайд этилишича, кириш имтиҳонлари ўтказишнинг тасдиқланган тартиби ва қабул жараёнларига оид маълумотлар Ўзбекистон мусулмонлари идорасининг muslim.uz сайти ва ижтимоий тармоқлардаги саҳифалари орқали бериб борилади.
Эслатиб ўтамиз, Ўзбекистонда 2020 йилда олий таълим муассасаларига кириш имтиҳонлари фақат иккита мутахассислик фанидан ўтказилади.
Маълумот учун, мутахассислик фанлари абитуриент танлаган бакалавриат таълим йўналишларига мос келувчи иккита фан ҳисобланади. Ҳар бир фандан 30 тадан жами 60 та тест саволи берилади. Ҳар бир тўғри жавоб 3,1 балл билан баҳоланади. Максимал балл — 186 балл.
Изоҳ (0)