Ўзбекистон терма жамоаси собиқ ҳужумчиси, ҳозирда Россиянинг «Ротор» жамоаси ёрдамчи мураббийи Максим Шацких «Тезкор студия» дастурида «Динамо Киев»ни тарк этиши арафасидаги сўнгги ўйинни ёдга олди.
2009 йили мавсумнинг сўнгги учрашувида киевликларнинг ўша вақтдаги устози Юрий Сёмин Шацкихни майдонга туширмаган эди.
«Бу ҳақида кўп бора гапирганман. Юрий Сёминдан хафа бўлмаганман, ҳеч қачон унга нисбатан кек сақламаганман. Шунчаки бир жиҳат ёқимсиз бўлган, сўнгги ўйин, натижа муҳим эмас... Мен бу клубга ўн йилимни бергандим ва мухлислар билан майдонда хайрлашишни истагандим, трибунада эмас. Бироқ бундан хафа бўлмаганман, шундан икки йил ўтиб Сёмин билан йиғинларнинг бирида учрашиб қолганмиз, биз сўрашдик ва бир дастурхон устида суҳбатлашдик.
Яна қайтараман, ҳеч қандай хафагарчилик йўқ, бироқ бу футбол томондан нотўғри. Агар бу ҳал қилувчи ёки чемпионлик ўйини бўлганида тўғри тушунган бўлардим. Аммо улар чемпионлик масаласини ҳал қилиб қўйган ва бу кераксиз ўйин эди. Ҳеч бўлмаса 30 сонияга бўлса ҳам майдонга тушириб, мухлислар билан хайрлашишга имкон бериш мумкин эди. Мен шундай ҳисоблайман», — дейди Шацких.
Шунингдек, ўзбекистонлик мутахассис Сёминнинг «Локомотив Москва» бош мураббийлигидан кетгани ҳақида гапириб ўтди.
«Ҳаммаси аста-секин шунга қараб келаётганди. Унинг клуб раҳбарияти билан муносабати анча олдин ёмонлашган ва истеъфо вақт масаласи эди. Ўйлашимча, у бунга тайёр эди, шу сабаб бу ортиқча шовқинсиз ҳал бўлди. Фақатгина «Локо» мухлислари бундан норози, чунки улар Сёминни ёқтиради. Ғалати бўлса ҳам бир гапни айтаман, мазкур қарор адолатсиз бўлди», — дейди Шацких.
Эслатиб ўтамиз, Шацких 1991—2009 йиллар мобайнида Киевнинг «Динамо»сида тўп сурган. Юрий Сёмин эса 2007—2009 йиллар оралиғида киевликлар клубини бошқарган.
Мавзуга доир:
- Максим Шацких Ўзбекистон терма жамоасида бирга ишлаган энг яхши мураббий номини маълум қилди
- Россия қуйи дивизионларида мавсум муддатидан аввал якунланди. Шацких ва Денисов жамоаси РПЛга йўл олди
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)