Бухоро вилоятининг Ғиждувон туманида расмий ҳужжатларни сохталаштириб, мактаб ўқитувчиларига тўланган иш ҳақларини тўланмай қолган иш ҳақи сифатида ҳисоблаб, ноқонуний пул ўзлаштирган мактаб бош ҳисобчисига суд ҳукми ўқилди. Бу ҳақда «Дарё»га Жиноят ишлари бўйича Ғиждувон туман суди судьяси Бобораҳим Очилов маълум қилди.
Мактаб бош ҳисобчисининг мазкур қилмиши 2019 йилнинг июль ойида Бухоро вилоят давлат молиявий назорат бошқармасининг назоратчи тафтишчилари томонидан ўтказилган текширув давомида фош этилган.
Маълум қилинишича, тафтишчилар 2013 йил 1 январдан 2017 йилнинг 1 апрелига қадар бўлган даврдаги харажатлар сметаси ижроси ҳамда бюджетдан ташқари маблағларнинг мақсадли сарфланишини кўздан кечирган ва фош этилган жиноятни ҳужжатлар асосида судга тақдим қилган.
Аниқланишича, 2007 йилдан буён Ғиждувон туманидаги 22-сонли умумий ўрта таълим мактабида бош ҳисобчи вазифасида ишлаб келган 47 ёшли З.А. мактабнинг ўқув ишлари бўйича директор ўринбосари томонидан ишлаб чиқилган табель соатларида кўрсатилмаган жами 46 миллион 830 минг сўм пулни 2017 йилдан бошлаб ўзлаштиришни бошлаган.
У табелда кўрсатилмаган дарс соатлари учун 2017 йилнинг август ноябрь ойлари иш ҳақига асоссиз равишда 5 миллион 921 минг 900 сўм ҳамда олдинги ойларда тўланган иш ҳақларини тўланмай қолган иш ҳақига ҳисоблаб, январь-сентябрь ойларига 2 миллион 183 минг сўм маблағни ўзлаштирган. Бундан ташқари, мактаб директорининг буйруғи бўлмаса-да, 2017/2018-ўқув йиллари ҳисобидан июнь-сентябрь ойларида 10 миллион 53 минг сўм рағбатлантириш пулларини қўшиб ёзиб, расмий ҳужжатларни сохталаштирган. Ўзлаштирилган маблағларни эса пластик картага ўтказиб, ўз эҳтиёжи учун сарфлаган.
Бош ҳисобчи, шунингдек, мактабда 0,5 штат бирлигида ишловчи турмуш ўртоғи М.П.нинг пластик картасига 15 миллион 960 минг 400 сўм пулни ноқонуний ўтказиб, шахсий эҳтиёжи учун ишлатган.
З.А. ўз манфаати йўлида оилавий аҳволи оғир бўлган укаси Т.А.дан ҳам фойдаланган.
«2015 йилга қадар Россияда ишлаб келганман. Кейин акам ишлайдиган мактабга 0,5 штат бирлигида сантехник вазифасига ишга кирдим. Менга тахминан 280 минг сўм ойлик иш ҳақи ҳисобланган. Бу пуллар фарзандларимга алимент тўлови учун ўтказилиши лозимлиги сабабли пластик картам доимо акамда турарди. Охирги марта ўтган йилнинг ёзида 60 минг сўм миқдорида нақд пул олганман холос. Пластик картамда 13 миллион 651 минг сўм пул борлигидан хабарим бўлмаган», — дейди суд залида гувоҳлик берган Т.А.
Мансабидан фойдаланиб, жами 46 миллион 830 минг сўм бюджет маблағларини талон-торож қилган мактаб бош ҳисобчиси З.А. айбига иқрор бўлган ва етказилган зарарни тўлиқ қоплаган.
Жиноят ишлари бўйича Ғиждувон туман суди ҳукмига кўра, мактаб бош ҳисобчисига Жиноят кодексининг 167-моддаси 2-қисмининг «б», «г» бандлари (Ўзлаштириш ёки растрата йўли билан талон-торож қилиш) ва 209-моддаси 2-қисмининг «а» банди (Мансаб сохтакорлиги) билан жиноят иши қўзғатилган ҳамда бир йил олти ой муддатга моддий жавобгарлик ишларида ишлаш ҳуқуқидан маҳрум этилиб, 20 миллион 668 минг 800 сўм жаримага тортилган.
Изоҳ (0)