«Вақф» хайрия жамоат фонди Сардоба сув омбори тўғонининг ёрилиши оқибатида вайрон бўлган Сирдарёдаги иккита масжид биносини капитал таъмирлаш ташаббусини илгари сурди.
Таъкидланишича, 13 май куни «Вақф» хайрия жамоат фонди ҳамда Дин ишлари бўйича қўмита масъул ходимлари Сирдарё вилоятига яна бир бор ташриф буюриб, тошқин оқибатида зарар кўрган Сардоба туманидаги «Алишер Навоий» ва «Юсуф» жоме масжидлари ҳолати билан танишган. Ўрганиш натижасига кўра, ушбу масжидларга тошқин оқибатида жиддий талафот етганлиги аниқланган.
«Масжидлар ва диний таълим муассасаларининг биноларини қуриш, таъмирлаш, реконструкция қилиш, ободонлаштириш, моддий-техник базасини мустаҳкамлаш — фонднинг асосий вазифаларидан ҳисобланади. Шунга мувофиқ фонд табиий офат оқибатида зарар кўрган ‘Алишер Навоий’ масжидини тубдан қайта қуриш ҳамда ‘Юсуф’ жоме масжиди биноларини капитал таъмирдан чиқариш ташаббусини илгари сурди», — дейилади хабарда.
«Вақф» хайрия жамоат фонди саховатпеша инсонларни масжидни қуришдек хайрли ишда ҳамкорлик қилишга чорлаб қолади.
Эслатиб ўтамиз, Сардобадаги фалокатда салкам 6 мингта турар жойга зарар етган. Фавқулодда вазият туфайли Сардоба, Оқолтин, Мирзаобод туманларидаги 24 та маҳалладан 90 мингга яқин фуқаро зудлик билан хавфсиз ҳудудга эвакуация қилинган.
Изоҳ (0)