«ВЭБ.РФ» — Россия давлат ривожланиш корпорацияси, давлат инвестиция банки ТМХ («Трансмашхолдинг» АЖ) томонидан ишлаб чиқарилган бешта электровозни «Ўзбекистонда темир йўллари» АЖга етказиб беришни молиялаштиради. Бу ҳақда Россия давлат ривожланиш корпорацияси пресс-релизида хабар қилинган.
2020 йил апрелда «ВЭБ.РФ» ва Ўзбекистон ташқи иқтисодий фаолият миллий банки (Ўзбекистон миллий банки) мазкур электровозларни етказиб бериш бўйича кредит шартномасини имзолаган.
«Ўзбекистон — ‘ВЭБ.РФ’нинг экспорт лойиҳалари бўйича етакчи ҳамкорларидан бири. Ўзбекистон миллий банки эса ишончли ҳамкорлар сафига киради. Россия—Ўзбекистон савдо-иқтисодий ҳамкорлигини мустаҳкамлаш мақсадида РФ иқтисодий институтлари қиймати 188 миллион еврога тенг 4 та кредит келишуви имзолаган. Тошкент метрополитени учун вагонлар етказиб бериш, шунингдек, энергетика объектларини модернизация қилиш бўйича лойиҳалар амалга оширилмоқда. Бугунги кунда ‘ВЭБ.РФ’нинг Ўзбекистондаги бир нечта лойиҳаларни молиялаштириш бўйича ишлари муваффақият билан амалга оширилмоқда», — деган «ВЭБ.РФ» банки раисининг ўринбосари Даниил Алгульян.
Шунингдек, «ВЭБ.РФ» пресс-релизида Ўзбекистон миллий банкининг мамлакатдаги банк тизимининг 24 фоиз активларига эгалик қилиши, бугунги кунда банкнинг капитали 1 миллиард 380 миллион АҚШ доллари экани, Standard&Poors бўйича рейтинги суверен Ўзбекистон рейтингига мутаносиб эканлиги қайд этилган.
2019 йилнинг ноябрь ойида Тошкент метроси учун олиб келинган Россиянинг «Метровагонмаш» компанияси томонидан ишлаб чиқарилган янги поездлар ишга туширилганди.
Изоҳ (0)