Россия Ташқи ишлар вазирлигининг расмий вакили Мария Захарова 14 май, пайшанба куни бўлиб ўтган брифингда Ўзбекистонда ўзбек тилида иш юритиш бўйича қонун лойиҳасига муносабат билдириб, Ўзбекистонда қонун лойиҳасининг тарафдорлари камчиликни ташкил қилиши ва расмий иш юритувида рус тили тўлиқ сақланиб қолган, деган фикрларни билдирган эди.
Олий Мажлис Қонунчилик палатаси депутати Расул Кушербаев унинг бу фикрларига муносабат билдирди.
«Ўзбекистонда давлат тили — ўзбек тили. Бироқ шунга қарамай, таълим муассасаларида ўқитиш 7 тилда олиб борилади, шу жумладан, рус тилида. Камида 11 тилда газета ва журналлар чоп этилади. Мамлакатда ўзбек тили давлат тили сифатида қонуний ҳисоблангани учун расмий ишда унга риоя этишда масъулиятни ошириш — суверен Ўзбекистоннинг мустақил иши. Ҳеч бўлмаса, расмий идорада давлат тилида иш юритилмаса, давлат тилининг мақоми қоладими?
Ўзбекистон — расмий давлат тилига эга суверен мамлакат. Қолганлар ҳам шу суверенликни ҳурмат қилиши шарт», — деди Расул Кушербаев.
Эслатиб ўтамиз, апрель ойининг охирларида Ўзбекистон Адлия вазирлиги давлат органлари ва ташкилотларида давлат тилида иш юритишга доир қонунчилик талабларига риоя этмаганлик учун маъмурий жавобгарлик киритиш тўғрисидаги қонун лойиҳасини жамоатчилик муҳокамасига қўйган, унда давлат тилида иш юритмаган мансабдорлар жаримага тортилиши мумкинлиги белгиланганди.
Вазирлик қонун лойиҳаси мазмунига оид асоссиз маълумотлар тарқатиш, айрим ижтимоий тармоқлар ва янгиликлар сайтларида унинг меъёрларини нотўғри талқин қилишга бўлган уринишларни ҳисобга олиб, мазкур лойиҳага доир холис ва асосли маълумотларни келтирганди.
«Миллий тикланиш» демократик партияси раҳбари Алишер Қодиров 15 май куни «Давлат тили ҳақида»ги қонуннинг янги таҳрири Олий Мажлис Қонунчилик палатаси муҳокамасига киритилганини маълум қилди.
Изоҳ (0)