АҚШ ва Буюк Британия олимлари макакаларда COVID-19’га қарши экспериментал вакцинани муваффақиятли синаб кўрди ва у маймунларни коронавирусга чалиниш оқибатида юзага келувчи пневмония ривожланишидан ҳимоя қилгани аниқланди. «РИА Новости»нинг хабар беришича, ушбу тадқиқот натижалари bioRxiv сайтида эълон қилинган.
«Биз ChAdOx1-nCoV-19 вакцинасининг битта дозаси SARS-CoV-2 юқори дозаси киритилганда ўпка касалланишининг олдини олишда самарали эканлигини кўрсатдик. Тадқиқот, шунингдек, вакцина макака-резусларни пневмония ривожланишидан ҳимоя қилганлигини кўрсатди», — дейилади тадқиқотда.
Олимларнинг таъкидлашича, вакцина дастлаб сичқонларда синаб кўрилган, шундан сўнг биологлар уни макака-резусларда синаб кўришга киришди.
Тадқиқот давомида ChAdOx1-nCoV-19 вакцинаси коронавируснинг барча белгиларининг тўлиқ тўпламини бошдан кечирган олтита приматга юборилган, шундан сўнг олимлар ҳайвонларда антитаналар ишлаб чиқарилишини кутган бўлиб, бунга 14 кундан 28 кунгача вақт кетган. Шундан кейин эса тадқиқотчилар макакаларни ҳақиқий вирус билан касаллантиришга уринган.
Ҳайвонларга SARS-CoV-2 вируси киритилганидан 7 кун ўтгач, олимлар вакцина вируснинг маймунлар ўпкасига киришдан тўлиқ ҳимоя қилгани, улар ҳеч бирида ўпка патологияси ёки вирусли пневмония кузатилмаганига гувоҳ бўлган. Бундан ташқари, бирорта ҳам макака ўпкасида SARS-CoV-2 коронавируси антигени топилмаган.
Ҳужжатда айтилишича, вакцинанинг муваффақиятли синови олимларга клиник синовларнинг биринчи босқичини 23 апрелда бошлашга имкон берди, 13 майга келиб уларда мингдан ортиқ кўнгиллилар иштирок этган.
Аввалроқ Японияда коронавирусни даволаш учун биринчи препарат тасдиқлангани хабар берилган эди. Ушбу препарат «Ремдесивир» бўлиб, у ўз даврида Эбола безгагини даволаш учун яратилганди.
Шунингдек, силга қарши курашиш бўйича халқаро ташкилот раҳбари олимлар COVID-19 вакцинасини ишлаб чиқишга диққатини жалб этиб, бошқа касалликларни унутиб қўяётгани таъкидлаган.
Изоҳ (0)