Хитой ҳарбий авиацияси томонидан Тошкент халқаро аэропортига олиб келинган тиббиёт воситалари Мудофаа вазирлиги мутасаддилари томонидан қабул қилиб олинди. Бу ҳақда «Ватанпарвар» газетаси мухбири «Дарё»га маълум қилди.
Таъкидланишича, Хитой ҳарбий самолёти бортида жами 2,5 тоннага яқин 13 турдаги тиббиёт воситалари олиб келинган. Улар, асосан, юқумли касалликлардан ҳимояловчи тиббий ниқоблар, кўзойнаклар, махсус кийимлар, масофадан туриб тана ҳароратини ўлчовчи термометр, дезинфекцияловчи аппарат каби энг зарур буюм ва воситалардан ташкил топган. Мазкур инсонпарварлик ёрдамининг умумий миқдори 2 миллион Хитой юани (қарийб 2 миллиард 870 миллион сўм)га тенг.
Ислом Каримов номидаги Тошкент халқаро аэропортида мазкур инсонпарварлик ёрдамини топшириш маросимида Хитойнинг Ўзбекистондаги элчиси Цзян Янь, ҳарбий атташе, катта полковник Сюй Чанчжи йилдан йилга ривожланиб бораётган Ўзбекистон—Хитой алоқалари биринчи навбатда икки давлат раҳбарларининг олий даражадаги учрашувларининг самараси эканини таъкидлади.
«Икки мамлакат ўртасида барча жабҳаларда ҳар томонлама мустаҳкам, дўстона алоқалар йўлга қўйилган. Президент Шавкат Мирзиёев раҳнамолигида амалга оширилаётган чора-тадбирлар, Хитой Қуролли Кучлари томонидан келтирилган мазкур кўмак ўзбек халқининг пандемиядан тезда қутулиб, одатдагидек фаол ҳаётга қайтиши ва дадил оёққа туришига муайян даражада хизмат қилади. Биз биргаликда, албатта, бу вирус устидан ғалаба қозонамиз», — дейди Цзян Янь.
Аввалроқ Жанубий Корея Ўзбекистонга навбатдаги инсонпарварлик ёрдамини жўнатгани ҳақида хабар берилганди.
Мавзуга доир: ХХРдан келтирилган ҳарбий гуманитар ёрдам — тиббиёт буюмлари қабул қилиб олинди (фото)
Изоҳ (0)