Ўзбекистоннинг Россиядаги элчихонаси мазкур мамлакатда коронавирус сабабли оғир вазиятга тушиб қолган ўзбекистонликларга ёрдам бериш учун «Меҳр» лойиҳасини ишга туширди. Бу ҳақда Ўзбекистон Ташқи ишлар вазирлиги хабар берди.
Маълум қилинишича, 14 майдан Ўзбекистоннинг Москвадаги элчихонаси ва Россиянинг турли ҳудудларидаги бош консулхоналари элчихона очган хайрия ҳисоб рақамига келиб тушган маблағлар ҳисобидан Россияда бўлиб турган ҳамда COVID-19 пандемияси сабабли жорий қилинган карантин ва чеклов чоралари сабабли оғир вазиятга тушиб қолган Ўзбекистон фуқароларига бир марта бериладиган моддий ёрдамни тўлаб беришни бошлайди.
Бир марталик моддий ёрдам Россия ҳудудида бўлиб турган қуйидаги тоифадаги Ўзбекистон фуқароларига тўлаб берилади:- Ногиронлар — тегишли тасдиқловчи ҳужжат (маълумотнома) тақдим этилган тақдирда;
- Қарамоғида 2 ёшгача фарзанди бўлган ҳамда ҳомиласи 7 ойликдан ошган аёллар — зарур тасдиқловчи ҳужжатлар (боланинг туғилганлиги ҳақидаги гувоҳнома, тиббиёт муассасидан маълумотнома) тақдим этилган ҳолда;
- Коронавирус тасдиқланган шахслар — тегишли тасдиқловчи ҳужжат асосида;
- Россия олий ўқув юртлари кундузги бўлимларида таҳсил олаётган талабалар — ўқиш жойидан тегишли маълумотнома асосида.
Молиявий ёрдамни олиш учун элчихона томонидан махсус ишга туширилган ўзбек ва рус тилларидаги «мехр.рф» портали орқали мурожаат юбориш лозим. Алоҳида қайд этишларича, мазкур хайрия акциясини амалга оширишда миллиардер Алишер Усмонов ҳам ёрдам берган.
«Элчихона хайрия ҳисоб рақамига молиявий маблағлар ўтказган ҳомийлар ва шерикларга миннатдорлик билдирамиз. Ватандошимиз, таниқли тадбиркор ва ҳомий Алишер Усмоновга у кўрсатган кенг кўламли ёрдами учун алоҳида миннатдорлик изҳор этамиз», — дейилади вазирлик хабарида.
Эҳтиёжманд фуқароларга молиявий маблағларни ажратиш жараёни шаффофлигини таъминлаш мақсадида, элчихона ҳар ҳафта ўз расмий сайтида ҳамда ижтимоий тармоқлардаги саҳифаларида тегишли ҳисоботлар эълон қилиб боради.Эслатиб ўтамиз, Россиядаги ўзбекистонликларни ватанга қайтариш учун 11—24 май кунлари Москва, Қозон, Санкт-Петербург, Ростов-Дон ва Новосибирск шаҳарларидан Тошкентга чартер рейслар амалга оширилади. Чартер рейсларда энг аввал беморлар, ҳомиладор аёллар, кексалар ва ёш болалилар олиб келинади. Мазкур рейсларга чиқиш учун рўйхатдан ўтиш керак.
Аввалроқ Россиянинг Самара вилоятида Қозоғистон чегарасидан бир неча ўн километр масофада бўлиб турган тахминан 800 нафар Ўзбекистон фуқароси ватанга қайтишда ёрдам сўраб Президент Шавкат Мирзиёевга мурожаат йўллагани ҳақида хабар берилганди.
Сўнгги маълумотларга кўра, Россияда COVID-19 пандемияси бошланганидан буён касалланганлар сони 242 271 кишига етди. Мамлакатда ҳозирга қадар коронавирусдан даволанишга муваффақ бўлганлар сони 48 минг кишидан ошди, пандемия бошланганидан буён COVID-19 оқибатида вафот этганлар сони 2212 кишига етди.
Изоҳ (0)