Бойсун ҳокимлиги эски бозор олдидаги экскаватор кабель ётқизиш учун келганини айтганди. АКТ вазирлиги кабель ётқизиш ишлари 6 май куни тугаганини маълум қилди

Сурхондарё вилояти Бойсун тумани ҳокимлиги 2020 йилнинг 12 май куни интернетда «Бойсун тумани ҳокими эски бозорни буздириб, савдогарларни янги бозорга ўтказмоқчи» мазмунида тарқалган видеога расмий муносабат билдирганди.

Ҳокимлик муносабатида эски бозор олдига келтирилган экскаватор бозорни бузиш учун эмас, балки оптик толали кабель ётқизиш учун жалб қилингани айтилганди. Унга кўра, эски бозорга кираверишдаги чорраҳада турган экскаватор бозорни бузиш учун эмас, балки «Ўзбектелеком» АК вилоят филиали Бойсун телекоммуникация боғламаси томонидан Алишер Навоий ҳамда Истиқлол кўчалари бўйлаб халқаро оптик толали алоқа кабелини ётқизиш мақсадида бу кўчада қазиш ишларини бажариш учун жалб қилинган.

Ўзбекистон Ахборот технологиялари ва коммуникацияларини ривожлантириш вазирлигининг маълум қилишича, Бойсун туманидаги «Тузбозор» маҳалласи ҳудудида жойлашган мазкур эски бозорга кириш қисмидаги чорраҳада турган экскаваторнинг «Ўзбектелеком» компанияси Сурхондарё филиали Бойсун телекоммуникация боғланмаси иш фаолиятига алоқаси йўқ.

Вазирлик Бойсун тумани ҳокимлигининг расмий баёнотидан келиб чиқиб маълум қилишича, мазкур ҳудудда «Магистрал ва мультисервис маълумотлар узатиш тармоғини кенгайтириш» (DWDM) лойиҳаси амалга оширилмоқда.

Лойиҳани амалга ошириш учун «Ўзбектелеком» акциядорлик компанияси Сурхондарё филиали Бойсун телекоммуникация боғланмаси туман марказидаги Алишер Навоий ҳамда Истиқлол кўчалари кесишмасида 200 метрли канализацияни қуриш ишларини олиб борган. Қурилиш ишлари 2020 йил 6 май куни тугатилган.