Афғонистон пойтахтидаги касалхонага уюштирилган ҳужум оқибатида ҳалок бўлганлар сони 24 кишига, жароҳат олганлар сони эса 16 кишига етди. Бу ҳақда мамлакат Соғлиқни сақлаш вазирлигига таяниб, «РИА Новости» хабар берди.
Аввалроқ 13 киши ҳалок бўлгани ва 15 киши жароҳат олгани маълум қилинганди.
Террорчи-худкуш 12 май, сешанба куни Кобулдаги шифохонага кираверишда ўзини порлатган, шундан сўнг жангарилар госпитал биносига бостириб кирган эди. Тиббиёт ходимларининг бир қисмигина бинони тарк этишга улгурган. Таъкидланишича, мазкур тиббиёт муассасаси «Чегара билмас шифокорлар» халқаро гуманитар ташкилоти томонидан қўллаб-қувватланади.
Кейинроқ маълум бўлишича, ҳужумни уюштирган жангариларнинг барчаси хавфсизлик кучлари томонидан йўқ қилинган.
Шифохонадан ташқари, теракт Нангархар провинцияси округи полицияси раҳбарининг дафн маросимида ҳам содир этилган. Провинция губернаторининг вакили Атолла Хогияни портлаш оқибатида 24 киши ҳалок бўлгани ва яна 68 киши жароҳат олганини маълум қилган.
Эслатиб ўтамиз, февраль охирида АҚШ ҳамда «Толибон» ҳаракати узоқ давом этган музокаралардан кейин ҳудудда ўт очмаслик ҳақида келишиб олган ва Афғонистон ҳукумати билан ҳам бу борада музокара олиб борилиши маълум қилинганди. Келишув имзолангач, Кобул қамоқхоналардаги «Толибон» ҳаракати аъзоларини озод қилиш бошланган. Март ойида эса Америка разведкаси «Толибон» ҳаракати келишув шартларига риоя қилиш ниятида эмаслигини маълум қилганди.
Изоҳ (0)