Коронавирусга гумонлангани сабабли Beeline компаниясининг Тошкент шаҳрида фаолият юритадиган 91 нафар ходими Юқори Чирчиқ туманидаги карантин зонасида карантинга олинган. Бу ҳақда Тошкент вилоят ҳокимлиги маълум қилди.
Beeline компанияси томонидан маълум қилинишича, мамлакатда карантин чоралари жорий қилингандан кейин ходимлар хавфсизлиги ва компания фаолиятининг узлуксизлигини таъминлаш мақсадида компания максимал даражада ходимларини масофадан ишлашга ўтказган.
«Аммо тезкор вазифалар бизни ва жамоанинг бир қисмини офисда бўлишга мажбур қилади. Афсуски, амалиёт шуни кўрсатадики, COVID-19’дан ҳеч ким ҳимояланмаган», — дейилади компания хабарида.
Компания томонидан билдирилишича, ходимлар коронавирусга чалинган бўлиши мумкинлиги хавфи пайдо бўлиши биланоқ оммавий тест ўтказилган. Шундан сўнг компания Соғлиқни сақлаш вазирлигининг ўз ходимларини 14 кунлик карантинга жойлаштириш бўйича кўрсатмаларига амал қилган.
«Вазият назорат остида. Биз улар билан доимий алоқадамиз ва уларга зарур ёрдамни тақдим этамиз. Одамлар бу компаниянинг энг қимматли ресурсидир», — дея изоҳ берган «Beeline Ўзбекистон» раҳбари Сергей Афонин.
Компаниянинг қўшимча қилишича, компания офисларида зарур ва тавсия этилган эҳтиёт чоралари кўрилган, «Beeline Ўзбекистон» одатдаги режимда ишламоқда.
Ўзбекистонда 12 май соат 16:00 ҳолатига кўра, коронавирусга чалинганлар сони 10 кишига кўпайиб, 2519 нафарга етди. Ўзбекистонда коронавирус инфекцияси илк бор қайд этилган 15 мартдан буён 2040 киши касалликдан соғайди, 10 киши эса инфекция асоратлари оқибатида вафот этган.
Изоҳ (0)