Олий Мажлис Қонунчилик палатаси депутати Расул Кушербаев ўзи ҳақидаги сўнгги кунлар пайдо бўлган хабарларга муносабат билдирди. Аввалроқ интернет сайтлари ва ижтимоий тармоқларда айрим тадбиркорлар унга қарши кўрсатма беришга мажбурлангани ҳақида хабарлар тарқалган эди.
Янгийўллик тадбиркор видеода баён этган ҳолатлар, ер участкаси билан боғлиқ вазият ва бошқа ишлар бўйича айрим прокуратура масъулларининг менга айблов уюштириш, мажбуран кўрсатма олишга уринишлари ҳақида фуқаролар томонидан менга ҳам мурожаатлар бўлган ва уларни имкон даражасида ўрганганман.Ушбу ҳолатлар бўйича ҳуқуқий баҳо бериш, депутат фаолияти, ўзи ва оиласи дахлсизлиги билан боғлиқ кафолатларни тўлиқ таъминлаш юзасидан тегишли юқори идораларга мурожаат қилганман.
Умид қиламанки, барча ҳолатлар ҳеч қандай таъсирларсиз холис ўрганилиб, ҳуқуқий баҳо берилади, депутат дахлсизлиги, шаъни ва ишчанлик обрўси таъминланади.
Эслатма учун, депутатнинг одамларга, тадбиркорларга ҳуқуқий кўмак бериши, мулоқот қилиши, дўстларга эга бўлиши, халқ дардини эшитиб, ҳар қандай вазиятда ҳам фуқароларнинг ёнини олишга уриниши қонунбузарлик бўлиши мумкинмас. Бу фақат айрим нопок шахсларнинг дунёқараши холос.
Бўлаётган ишлардан қаттиқ хафаман.
Барчага эътибор ва маънавий қўллов учун раҳмат!
Расул Кушербаев, Олий Мажлис Қонунчилик палатаси депутати
Изоҳ (0)