АҚШда коронавирус оқибатида вафот этганлар сони 80 минг кишидан ошиб кетди. Бу ҳақда касаллик тарқалишини реал вақтда кузатиб бораётган Жонс Ҳопкинс университети маълумотларида келтирилган.
Мамлакатда коронавирусга чалинганларнинг жами сони 1,34 миллион кишига етган. Касалларнинг асосий қисми Нью-Йорк (337 минг) ва Нью-Жерси (140 минг) штатлари ҳисобига тўғри келмоқда. Мазкур штатларда COVID-19 қурбонлари сони мос равишда 26,6 минг ва 9,3 минг кишидан ошган.
CBS New York’нинг маълумотларига кўра, 11 май куни Нью-Йорк штатида коронавирус билан касалланиш бўйича 488 та ҳолат қайд этилган бўлса, 161 бемор вафот этган. Таъкидланишича, бу коронавирус билан касалланганлар ва қурбонлар сони бўйича 19 мартдан буён кузатилган энг яхши кўрсаткич ҳисобланади.
АҚШда ҳозирга қадар 232,7 минг бемор даволанишга муваффақ бўлган. АҚШ президенти Дональд Трампнинг маълум қилишича, ўтган бир ҳафта ичида бутун мамлакат бўйлаб коронавирусга 10 миллионта тест ўтказилган. Май ойида АҚШ ҳукумати аҳолининг камида 2 фоизини тестдан ўтказишни режалаштирмоқда.
Мавзуга доир: Трамп коронавируснинг ўз-ўзидан йўқолиб кетишини айтди
Изоҳ (0)