Апрель ойининг охирида COVID-19 ташхиси қўйилган Россия бош вазир Михаил Мишустин касалхонада даволанишни давом эттирмоқда. «РИА Новости»нинг хабар беришича, бу ҳақда унинг матбуот котиби Борис Беляков маълум қилган.
«Шифокорлар унинг соғлиғи яхшиланаётганини қайд этмоқда», — деган у. Шунингдек, ҳукумат раҳбари масофадан туриб ишлашда давом этаётганини қўшимча қилган.
«Ҳамкасблар билан видеоконференциялар ва телефон орқали йиғилиш ўтказмоқда. Президент билан ҳам доимий алоқада», — деган бош вазир матбуот котиби.
Эслатиб ўтамиз, Мишустинда 30 апрель куни COVID-19 борлиги аниқланиб, 39 даража иситма билан касалхонага ётқизилган, бош вазир вазифасини вақтинча бажариш унинг биринчи ўринбосари Андрей Белоусов зиммасига юкланганди. Мишустиннинг ўзи Россия президенти Владимир Путин билан суҳбатда соғайганидан кейин ҳам лавозимига қайтмаслиги мумкинлигини айтганди.
2 май куни Россия қурилиш вазири Владимир Якушев ва унинг ўринбосари Дмитрий Волковда ҳам коронавирус аниқланди.
Мишустин бутун дунёда коронавирусга чалинган биринчи бош вазир эмас, ундан аввал март охирларида Буюк Британия бош вазири Борис Жонсон COVID-19’ни юқтириб олган ва апрель охирида касалликдан тузалганди.
Изоҳ (0)