Сув ресурсларидан оқилона фойдаланиш масаласи Ўзбекистон билан ҳал қилинади. Бу ҳақда Қозоғистон президени Қосим-Жўмарт Тўқаев ўзининг Twitter’даги саҳифасида маълум қилди, деб хабар бермоқда Tengrinews.
«Тошқиндан жабр кўрган Туркистон вилояти Мақтаарал тумани аҳолиси янги ёки таъмирланган уй жой билан тўлиқ таъминланади. Уларнинг ҳар бирига республика бюджетидан 100 минг тенге берилади. Вазият назорат остида», — деб ёзган Тўқаев.
Шунингдек, сув ресурсларидан самарали ва оқилона фойдаланиш масаласи Ўзбекистон томони билан яқиндан ҳамкорлик қилиш асосида ҳал этилишини қўшимча қилган.
Ўзбекистон Президенти Шавкат Мирзиёев ҳам 5 май куни бўлиб ўтган видеоселектор йиғилишида Ўзбекистон ҳукумати Сардоба сув омборидаги фалокат сабаб қўшни мамлакатда юз берган сув тошқинлари оқибатларини бартараф этишда қозоғистонлик ҳамкасблари билан яқиндан ҳамкорлик қилишини билдирганди. Президент топшириғига кўра, шу куннинг ўзида Ўзбекистон сув тошқини оқибатларини бартараф этишда кўмаклашиш учун Қозоғистонга 209 нафар шахсий таркиб, 169 та қишлоқ хўжалиги, муҳандислик ва ёнғин-қутқарув техникаларидан иборат қўшимча куч ва воситалар жўнатилди.
Эслатиб ўтамиз, Сардоба сув омборидаги сув тошқини оқибатида Қозоғистоннинг Туркистон вилояти Мақтаарал тумани ҳудудида техноген хусусиятга эга фавқулодда ҳолат эълон қилинганди. Сўнгги маълумотларга кўра, тошқин натижасида вилоят ҳудудида 30 мингдан ортиқ одам эвакуация қилинган. Мазкур фавқулодда ҳолатни муҳокама қилиш учун Қозоғистон расмийлари Ўзбекистонга ташриф буюрди.
Изоҳ (0)