Сирдарё вилояти ИИБ Мирзаобод туманида фуқароларнинг мол-мулки, чорва моллари талон-торож бўлаётганлиги ҳақидаги миш-мишларга муносабат билдирди.
Вилоят ички ишлар бошқармаси берган маълумотга кўра, бу каби асосланмаган хабарларда хорижда бўлиб турган Ўзбекистон фуқаролари томонидан тарқатилмоқда. Аслида ИИБга ва вилоятдаги бошқа ҳуқуқни муҳофаза қилувчи органларга ушбу мазмундаги мурожаатлар келиб тушмаган.
Хабарда фалокат юз бериб, аҳолиси эвакуация қилинган ҳудудлар ички ишлар органлари томонидан тўлиқ назоратга олиниб, хавфсизлиги таъминланаётгани қайд этилган. Сирдарё вилояти ИИБнинг маълум қилишича, сув тошқини оқибатида ҳудудда 3743 та чорва моллари нобуд бўлган.
Омон қолган 4274 чорва моллари хавфсиз ҳудудларга кўчирилган ва ўз эгаларига топширилмоқда. Мирзаобод туманининг «Навбаҳор» маҳалласи беда майдонида 200 дан ортиқ чорва моллари Ички ишлар органлари ходимлари томонидан қўриқланмоқда.
«Чорва моллари сақланаётган майдонда тўсиқ постлар ташкил қилинган. Мазкур постда чорва молларини олиб кетаётган ҳар бир юк машинаси ва пиёдалар назоратдан ўтказилиб, ушбу мулк айнан шу фуқарога тегишли эканлиги синчиклаб ўрганилиб, жараён фото ва видеотасвирга олиниб, тегишли ҳужжатлар расмийлаштирилгандан сўнггина чорва моллари ўз эгаларига қайтарилади. Бу орқали чорва моллари ва бошқа нарса-буюмлар туман ҳудудидан ноқонуний олиб чиқилишининг олди олиняпти.
Чорва молларини йўқотган (ўғирлатган) фуқаролардан чорва молларини олиб кетишларини сўраймиз», – дейилади хабарда.
Изоҳ (0)