Наманган вилоятининг Тўрақўрғон туманида иккита машинани оқизиб кетган сел одамларга талафот етказмади. Бу ҳақда «Дарё» мухбири Азизбек Абдувалиев хабар бермоқда.
Воқеа 5 май куни соат 18:00 атрофида туманнинг Қуйимозор қишлоғида рўй берган. Дала юмушларини бажариб, «ГАЗ 24» машинасида уйига қайтаётган Санжар Солиев Косонсойни кечиб ўтаётганида сув кўпайгани ва оқим тезлиги сабаб бошқарувни йўқотган.
— Машинада аяларим, жиянларим ҳам бор эди. Уларни туширишга улгурдим, кейин машинани сув суриб кетди. Шундан сўнг фавқулодда вазиятлар бўлимига қўнғироқ қилдим. Агар улар келиб ёрдам бермаганида автомобилим оқиб кетиши аниқ эди, — дейди Санжар.
Туман ФВБ бошлиғи Фозилжон Хўжамбердиевга кўра, шу куни сой сели оқизиб кетган транспорт воситалари қаторида яна бир фуқаронинг «ВАЗ 2107» машинаси ҳам бўлган.
— Аслида сел келмаган пайтлар бу ердан бемалол одамлар, машиналар ўтади, сув оқими ҳам чўчимайдиган даражада. Бироқ ўша куни кучли ёмғир ёғиши сабабли сел келиб, шундай ҳодиса сабаб бўлди. 2 та махсус техника ва 10 нафарга яқин ходим ёрдамида мурожаат бўлганидан сўнг ярим соатлар ўтиб икки машинани ҳам қутқаришга муваффақ бўлдик, — дейди Фозилжон Хўжамбердиев.
Мавзуга доир: Видео: Наманганда сел иккита машинани оқизиб кетди
Изоҳ (0)