Тамаки маҳсулотларини чекиш коронавирусдан ҳимоя қилмайди, аксинча COVID-19’нинг оғир босқичи бошланишига шароит яратади. Бу ҳақда ЖССТ фавқулодда касалликлар бошқармаси раҳбари Мария ван Керхов маълум қилган.
У журналистларнинг Францияда ўтказилган тадқиқотларда чекувчилар чекмайдиганларга нисбатан камроқ COVID-19 билан касалхонага ётқизилаётгани маълум бўлганлиги ҳақидаги саволларига жавобан бу каби тадқиқотларнинг натижалари ҳақиқатан ҳам ОАВда эълон қилингани, бироқ уларга тақриз берилмаганини билдирган. Шунингдек, ван Керхов тадқиқотлар чекиш коронавирусдан ҳимоя қилишини исботлаш мақсадида ўтказилмаганлигини қайд этган.
ЖССТ вакили чекиш нафас йўлларига зарар келтириши ва бу коронавирусга бевосита алоқадор эканини эслатган.
«Эълон қилинган тадқиқотлар натижаларининг бир нечтаси тамаки чекиш касалликнинг оғир оқибатларини келтириб чиқаришини аниқлаган», — дейди ЖССТ вакили.
Керхов чекувчилар сунъий нафас бериш аппаратларига ётқизилиши ва касаллик оқибатида вафот этиши мумкинлиги ҳақида ҳам гапирди.
Апрель ойида франциялик олимлар Париж касалхоналарига COVID-19 коронавирус инфекциясини юқтиргани туфайли ётқизилган 11 минг нафар беморнинг 8,5 фоизи чекувчилар эканини аниқлаган, мамлакатдаги чекувчилар эса аҳолининг 25,4 фоизни ташкил қилади.
Россия соғлиқни сақлаш вазирлиги ҳам чекувчилар орасида коронавирус инфекциясига чалиниш ҳолатлари кам кузатилаётгани илмий жиҳатдан асосланмаганини қайд этган.
Изоҳ (0)