АҚШ ёлланма жангариларнинг Венесуэлага бостириб киришга уринишига алоқадор эмас, деди АҚШ давлат котиби Майк Помпео журналист Бен Шапирога берган интервьюда. «РБК»нинг хабар беришича, суҳбат матни Давлат департаменти сайтида эълон қилинган.
«Буни биз бошқармаганмиз. (Венесуэле президенти Николас) Мадуро эса буни айнан шундай кўрсатмоқчи эканлигини биламан», — деган Помпео. Унинг айтишича, бу вазиятда Мадурони жабрланувчи сифатида кўрсатишга уриниш хато. Шунингдек, Мадуро босқинчилик ҳақида олдиндан билган ва бу вазиятдан АҚШни айблаш учун фойдаланган бўлиб чиқса, бундан ажабланмаслигини айтган.
Венесуэлада юз берган воқеаларга АҚШнинг алоқадор эмаслигини, шунингдек, Миллий Хавфсизлик Кенгаши ҳам эълон қилган. «АҚШ ҳукумати яқинда Венесуэлада рўй берган воқеаларга ҳеч қандай алоқадор эмас. Бунинг акси таъкидланаётган баёнотлар ишончли эмас. Агар бу гиёҳванд моддалар савдосида айбланган Мадуро айтаётганидек АҚШ томонидан режалаштирилган операция бўлганида, у очиқ, тўғридан-тўғри ва самарали бўлар эди», — деб таъкидланган уларнинг баёнотида.
Венесуэла Ички ишлар вазирлиги 3 май куни хавфсизлик кучлари La Guayra соҳилига қуролланган ёлланма жангарилар гуруҳининг кириб келишининг олдини олганини маълум қилган эди. Унда айтилишича, улар теракт содир этиб, ҳукумат раҳбарларини ўлдириш ва давлат тўнтаришини амалга оширишни режалаштирган.
Мадуронинг сўзларига кўра, ёлланма жангариларнинг асосий вазифаси уни ўлдириш бўлган. Улар Колумбияда тайёрланган, ҳукумат эса АҚШ ҳукумати ёрдами билан уларни молиялаштирган.
Колумбия Ташқи ишлар вазирлиги, ўз навбатида, мамлакатнинг Венесуэлага ҳарбий-денгиз босқинчилигига уринишга алоқадорлигини рад этган.
Мадуро босқинчилик уринишида иштирок этган 13 киши қўлга олингани, улардан иккита нафари АҚШ президенти Дональд Трампнинг хавфсизлик хизмати ходимлари эканлигини маълум қилган. 6 май куни Венесуэла ҳукумати видеолавҳа эълон қилган бўлиб, унда қўлган олинган АҚШ фуқароларидан бири сўроқ пайтида унинг гуруҳи Каркас аэропортини эгаллаб олишни режалаштирганини айтган.
Кейинчалик Мадуро Колумбиядан жангариларнинг Венесуэлага бостириб кириши учун жавобгарлик АҚШнинг муваққат ишончли вакили Жеймс Стори зиммасида эканлигини айтди. Унинг айтишича, Стори Венесуэладан ҳайдалганидан сўнг, у Колумбия пойтахти Боготага жойлашган.
Изоҳ (0)