Россияда коронавирусга чалинганлар сони 200 минг кишига яқинлашиб қолди. Ўтган бир сутка ичида 10 мингдан ортиқ одамда COVID-19 аниқланган

Россияда ўтган бир сутка ичида коронавирус билан касалланиш бўйича 10 817 та ҳолат қайд этилди. Бу ҳақда тезкор штаб маълумотларида келтирилган.

Бутун мамлакат бўйлаб коронавирусга чалинганлар сони 198 676 кишига етди.

Москвада ўтган бир сутка ичида 5667 кишида коронавирус аниқланган бўлиб, пойтахтда вирус билан касалланганларнинг жами сони 104 минг кишидан ошган.

Шунингдек, ўтган сутка давомида 104 бемор COVID-19 қурбонига айланган. Россияда коронавирус пандемияси бошланганидан буён жами 1827 киши вафот этган. Шу билан бирга, бир сутка ичида 5308 бемор даволанишга муваффақ бўлган — бу пандемия бошланганидан буён рекорд кўрсаткич.

Мамлакатда 8 май куни давомида коронавирусга 234,4 минг маротаба тест ўтказилган (пандемия бошланганидан буён ўтказилган тестлар сони 5,2 миллиондан ошмоқда).

Аввалроқ Россия коронавирусга чалинганлар сони бўйича дунёда бешинчи ўринга чиқиб олгани ҳақида хабар берилганди.