Кроссовка мода ихлосмандлари учун энг севимли пойабзаллардан бири ҳисобланади. Лекин нима учундир кўпчиликда кроссовкани фақатгина жинси ёки спорт кийими билан кийиш керак, деган тушунча бор. Аслида эса ушбу оёқ кийим билан турли образлар яратиш, бошқа услуб билан мослаш мумкин. Шундан келиб чиққан ҳолда, кроссовка билан яратиш мумкин бўлган ўзига хос образларни тақдим қиламиз.
1.Этак қисми кенг бўлган юбка баҳор-ёз мавсумида энг долзарб либослардан бири ҳисобланади. Бундай юбкани фақатгина пошнали туфли ва балеткалар билан кийиш мумкин деб ўйловчилар янглишади — кроссовка билан мослаш қизиқарлироқ кўрсатади. Мазкур образни принтсиз, минимал услубдаги футболка билан кийиш тавсия қилинади.
2. Оқ рангли тул матосидан тикилган узун либос билан кроссовка кийсангиз, ортиқча безакларсиз ҳам башанг кўринасиз.
3. Спорт услубидаги оқ кроссовка билан классик услубдаги шорти ва жакетни мослаш ноанъанавий образ яратилишига сабабчи бўлади. Бунда бел қисми юқори, бичими кенг бўлган шорти ҳамда паст қисми белдан тушиб турадиган, эркин жакетни танлаш тавсия қилинади.
4. Исталган зерикарли образни кроссовка ва ранг-баранг пайпоқлар билан ёрқин қилиш мумкин. Узун оқ пайпоқ, жинси ва футболка кундалик учун энг яхши танлов. Агар яна ҳам ўзига хос бўлишни истасангиз, ёрқин рангли пайпоқ кийинг ва унинг рангидан аксессуар — сумка ёки ободок тақинг.
Изоҳ (0)