Испанияда коронавирус сабабли юзага келаётган ўлимларнинг суткалик кўрсаткичи пасайди. Сўнгги бир суткада касалликдан 213 киши вафот этган, бир кун аввал эса бу кўрсаткич 244 кишини ташкил қилган. Бу ҳақда Reuters хабар берди.
Ўлим кўрсаткичи бир кун аввалги кўтарилишдан кейин яна пасая бошлади, бунга қадар уч кун давомида суткалик ўлим ҳолатлари сони 200 тадан камроқ бўлган. Мамлакатда касалланганлар сони бир суткада 754 кишига ортган.
Испанияда коронавирусга чалинганлар сони 221 447 кишига етган, касалликдан вафот этганларнинг умумий сони эса 26 минг кишидан ошган. Касалликдан тузалганларнинг умумий сони эса 128 511 нафарга етган, сўнгги бир суткада 2509 киши касалликдан соғайган.
Аввалроқ Испанияда кўчада сайр қилиш ва спорт билан шуғулланишга рухсат берилган эди. Мамлакат Соғлиқни сақлаш вазирлиги 2 майдан бошлаб сайр қилиш ва очиқ ҳавода спорт билан шуғулланиш учун турли ёшдаги гуруҳларга муайян вақтларни белгилади:
- 14 ёшдан 70 ёшгача бўлган фуқаролар соат 06:00 дан 10:00 гача ва 20:00 дан 23:00 гача;
- 70 дан ошган шахслар ва алоҳида ёрдамга муҳтож фуқаролар 10:00 дан 12:00 гача ва 19:00 дан 20:00 гача;
- вояга етмаганлар эса соат 12:00 дан 19:00 гача
Ёши каттароқ одамлар ёшлар билан тўқнаш келмаслиги учун вақт шундай алоҳида ажратиб чиқилган. Испанлар фақат истисно ҳолатларда, агар бунга тиббий сабаблар бўлса, белгиланган вақтга амал қилмаслиги мумкин.
Изоҳ (0)