Ҳиндистон шарқидаги Вишакхапатнам шаҳри яқинида жойлашган LG Polymers кимё заводида газ сизиб чиқиши юз берди. Ҳодиса оқибатида камида тўққиз киши ҳалок бўлган, 300 дан ортиқ одам касалхонага ётқизилган. Яна тахминан 1500 киши эвакуация қилинган. Бу ҳақда Reuters хабар берди.
WARNING: GRAPHIC CONTENT - At least nine people have died after a chemical gas leak at an LG Polymers facility in the southern Indian state of Andhra Pradesh https://t.co/FSpnmfq0wk pic.twitter.com/sX9X6MW5Ka
— Reuters (@Reuters) May 7, 2020
Қайд этилишича, LG Polymers заводига эгалик қилувчи Жанубий Кореянинг LG Chem компанияси вазият назорат остида эканлигини маълум қилган. Компания етказилган зарар миқдори, одамларнинг ўлими сабаби ва ҳодиса тафсилотлари баҳоланаётганини билдирган. Фавқулодда хизматлар вакили ҳам вазиятнинг назорат остида эканлиги ва газ сизиб чиқиши тўхтатилганини маълум қилган.
Хабар берилишича, ҳодиса 7 майга ўтар кечаси маҳаллий вақт билан соат 02:30 да юз берган. Полиция ходимининг айтишича, газ сизиб чиқиши коронавирус муносабати билан жорий қилинган чекловлар сабабли қаровсиз қолган катта сиғимларда юз берган. Маълумотларга кўра, завод бир неча кун аввал, Ҳиндистонда COVID-19 сабабли жорий қилинган чекловлар юмшатилганидан кейин очилган.
LG Polymers заводи шиша толали пластик, резина ва латекс ишлаб чиқаришда фойдаланиладиган полистирол ишлаб чиқаради. Компанияга 1961 йилда Hindustan Polymers номи остида асос солинган, 1997 йилда завод LG Chem ихтиёрига ўтган.
Жонс Ҳопкинс университети маълумотларига кўра, Ҳиндистонда коронавирусга чалинганлар сони 53 минг кишидан ошган, 1787 киши касаллик оқибатида вафот этган. 15 331 киши касалликдан тузалишга муваффақ бўлган.
Изоҳ (0)