Буюк Британия коронавирусдан ўлим даражаси бўйича Европанинг барча давлатларини ортда қолдирди. Пандемия бошлангандан бери мамлакатда 32,3 мингдан ортиқ ўлим қайд этилди, яқин вақтгача эпидемиологик вазият энг оғир деб ҳисобланган Италияда эса ўлим ҳолатлари 29 мингдан ортиқ.
Independent хабарига кўра, бундай маълумотлар Миллий статистика хизмати (ОNS) томонидан эълон қилинган.
ОNS ҳисоботига кўра, аксарият ўлим ҳолатлари касалхоналарда содир бўлган (19,6 минг). Қарийб 5,9 минг киши қариялар уйи ва интернатларда вафот этган. COVID-19 билан касалланганларнинг 1,3 мингдан ортиғи ўз уйида, 301 киши паллиатив ёрдам кўрсатилувчи махсус касалхона (хоспис)ларда вафот этган.
Нашрнинг таъкидлашича, Буюк Британиянинг Соғлиқни сақлаш вазирлиги томонидан тақдим этилган статистикада фақатгина шифохоналарда содир бўлган ўлимлар ҳисобга олинган.
BBC’нинг ёзишича, турли мамлакатларда ўлимни ҳисоблашнинг турли хил усулларига қарамай, ОNS’нинг янги статистикаси коронавирус қурбонларининг ҳақиқий сони бундан ҳам кўпроқ бўлиши мумкинлигини кўрсатмоқда.
Буюк Британия бош вазири Борис Жонсон мамлакатда эпидемия чўққисидан ўтганини, ҳукумат карантин чораларини юмшатиш масаласини кўриб чиқишини билдирганди. У иқтисодиётни тиклаш, болаларни мактабга қайтариш, компаниялар ишини қайта тиклаш бўйича батафсил режани тақдим этишга ваъда берган.
Айни пайтда дунё бўйлаб коронавирусга чалинганлар сони 3,5 миллиондан, қурбонлар эса 250 минг кишидан ошиб кетди.
Изоҳ (0)