«Gazeta.uz» журналисти Никита Макаренконинг Миллий гвардия ходимига асосланиб хабар беришича, гвардиячилардан бири тошқин вақтида ҳаётини хавф остига қўйиб, тўққиз кишини қутқариб қолган.
«Воқеа жума куни бўлди. Сув катта тезликда кириб келишни бошлаганида бир оила ташқарига чиқишга улгурмай, уйида қолиб кетди. Атроф аллақачон сувга тўлиб бўлган эди. Бир гвардиячи, ёш йигит, дарров ўша томонга отилди. Тўққиз кишини олиб чиқди, ҳаммани қутқариб қолди», — дейди Миллий гвардия ходими.
Аввалроқ тошқиндан жиддий зарар кўрган Сардоба туманидаги «Қўрғонтепа» маҳалласида бир фермер сувда оқиб кетаётган икки қизалоқни қутқариб қолгани ҳақида хабар берилган эди. Бундан ташқари, Ўзбекистон ҳарбий-ҳаво кучлари вертолётлари ёрдамида 300 га яқин одам қутқарилган.
Ҳодиса юз берган куни ижтимоий тармоқларда тарқалган видеоларнинг бирида тошқин бир хонадонни вайрон қилаётгани, видеоа олаётган фуқаро эса ўша томонга Миллий гвардия ходими сузиб кетганини таъкидлаётганини кўриш мумкин. Бундан ташқари, тошқин ичида қолган қишлоқда қолиб кетганларни излаётган қутқарувчилар видеоси ҳам эълон қилинган эди.
Изоҳ (0)