Сирдарё вилоятидаги Сардоба сув омборида рўй берган авария сабаб эвакуация қилинган кўплаб фуқаролар ҳозирда зарур ҳужжатларсиз қолди.
Давлат хизматлари агентлиги матбуот хизматининг хабар беришича, агентлик раҳбарияти Сирдарёда бўлиб, жойларда аҳоли билан учрашмоқда. ДХА Жиззах вилояти бошқармаси мутахассислари эса ҳужжатлари йўқолган фуқаролар рўйхатини шакллантиряпти.
«Хусусан, Жиззах олимпия захиралари мактаб-интернати ётоқхонасига жойлаштирилган 239 нафар Оқолтин тумани аҳолисининг 32 нафарида туғилганлик, никоҳ қайд этилганлик гувоҳномалари, фуқаролик паспорти, кадастр ҳужжатлари йўқолгани аниқланган. Уларга Давлат хизматлари марказлари томонидан экстерриториаллик тамойили асосида мазкур ҳужжатлар қайта расмийлаштириб берилади», – дейилади агентлик хабарида.
Дастлабки маълумотларга кўра, 3 май куни 1 608 нафар фуқаронинг паспорт, гувоҳнома ва бошқа ҳужжатлари мавжудлиги юзасидан мониторинг ўтказилган. Шундан 292 фуқаронинг 94 нафарида паспорт, 134 нафарида туғилганлик, 64 нафарида никоҳни қайд этиш гувоҳномаси йўқлиги маълум бўлган.
Шунингдек, Жиззах шаҳар Давлат хизматлари марказида инсонпарварлик ёрдами тўпланиб, ушбу буюмларни вилоятнинг Дўстлик туманига жойлаштирилган 4 070 нафар сирдарёликларга юбориш ишлари ташкил этилгани қўшимча қилинган.
Аввалроқ Шавкат Мирзиёевнинг яна Сирдарёга боргани ва Сардоба сув омбори ҳудудидаги тиклаш-таъмирлаш ишлари билан танишгани, тумандаги «Қўрғонтепа» маҳалласини бориб кўргани, у ерда аҳоли билан суҳбатлашгани ҳақида хабарлар берилганди.
Тошкент шаҳар ҳокимлиги Сардобада сув тошқинидан жабр кўрганларга барча маҳсулотлар етказилгани ва уларда ҳозирча эҳтиёж йўқлигини билдирган.
Эслатиб ўтамиз, Сирдарёда 1 май куни тонгда Сардоба сув омбори тўғони пикетларидан бирининг ёрилиб кетиши оқибатида сув тошқини юз берган, 2 май ҳолатига кўра, 70 мингга яқин аҳоли хавфсиз ҳудудга кўчирилган, камида 56 киши турли тан жароҳатлари билан касалхоналарга ётқизилган. Ҳодиса юзасидан жиноят иши қўзғатилган, тергов ҳаракатларини ДХХ олиб боради.
Мавзуга доир: Фото: Сардобадаги тошқиннинг фазодан кўриниши
Изоҳ (0)