Сирдарё вилоятидаги Сардоба сув омборида юз берган фалокатдан сўнг бутун Ўзбекистон сув тошқинидан жабр кўрган ватандошларга ёрдам қўлини чўзди. Қайд этишларича, хайрия ёрдами ҳажми шу қадар кўп бўлганки, 3 май ҳолати оқшомига келиб сирдарёлик ватандошларнинг ёрдамга эҳтиёжи қолмагани маълум қилинди.
Шунга қарамай, ҳудудларда ташкил этилган хайрия ёрдамини қабул қилиб олиш марказларига мурожаатлар давом этмоқда, ёш-у қари жараёнга ўз ҳиссасини қўшишга ҳаракат қилмоқда. Қашқадарёда қайд этилган ҳолат айниқса эътиборга молик — Қарши шаҳрининг «Беклар» маҳалласида яшовчи 11 ёшли Мирзоҳид Ғуломжонов ўзи йиғиб юрган 12 минг пулини келтириб, хайрия ёрдамига қўшган.
Қайд этиш жоиз, Президент Шавкат Мирзиёев 3 май куни сув тошқинидан жабр кўрган сирдарёликлар билан учрашувида «бир-биримизга меҳримиз катта, бағримиз кенглигини бутун дунё кўриб турибди, бу талофатдан қудратли бўлиб, бир-биримизга меҳримиз ошиб чиқишимиз керак», деб таъкидлаган эди.
Мавзуга доир: Сардобадан ҳикоялар
Изоҳ (0)