«Gazeta.uz» нашри журналисти Никита Макаренко Сирдарё вилоятида 1 май куни Сардоба сув омбори тўғонининг ёрилиб кетишио оқибатида юз берган сув тошқинидан жабр кўрган маҳаллий аҳоли, шунингдек, офат ҳудудида ишлаётган турли идоралар ходимлари билан суҳбатлашди.
Қутқарув операцияси иштирокчиси:
«Жума куни сув остида қолган қишлоқдан барча аҳоли эвакуация қилинди. У ерда ҳеч ким қолмаган, деб ҳисобланилаётганди. Қанчадир вақтдан кейин ходимлар икки қаватли уй олдидан ўтаркан, иккинчи қаватда ўтирган кекса аёлни тўсатдан кўриб қолди. У дераза олдида хотиржам ўтирар, биринчи қават эса сув билан тўлганди. Подъезд орқали кириб бўлмасди. У кетишни унчалик ҳам хоҳламади, кўндиришга мажбур бўлдик. Кейин уни ойнадан чиқариб олишди. У фақат ўз невараларидан хавотирда эди. ‘Невараларим қани?’ — дерди. Уларни эса аллақачон қутқаришганди».
Мирзачўл қишлоғида яшовчилардан бири:
«Биз уйга кирмаймиз, уйда бизга ҳеч нарса керак эмас. Фақат молларимни олиб чиқишга рухсат беринг. Кириб фақат сигирларимни олиб чиқаман. Уйга кирмаймиз, биламиз, хавфли. Ваъда берамиз. Чўкиб кетмаймиз, мана, укам билан борамиз. У ерда сигирларимиз бор. Уларни олиб чиқишимиз керак».
Миллий гвардия ходими:
«Воқеа жума куни бўлди. Сув тезлик билан кириб кела бошлади. Бир оила уйда қолиб кетибди, улар қочишга улгурмай қолган. Атроф сув билан тўлиб бўлган. Бир гвардиячи, ёш йигит, ўша ергача сузиб борди ва тўққиз кишини олиб чиқди, ҳаммани қутқарди».
Ҳуқуқни муҳофаза қилиш органи ходими:
«Биз ташлаб кетилган биноларни қўриқлаяпмиз. Ҳам талончилардан, ҳам аҳолининг ўзидан. Қанчалик хавфли бўлмасин, аҳоли бу ерга қайтишга уриняпти. Масалан, кимнингдир уйда паспорти, ҳужжатлари қолиб кетган. У ҳужжатлар керак бўлади деб ўйлаб, уйигача сузиб боришга ҳаракат қиляпти. Биз эса уларни тутиб оляпмиз. Бир киши пулларини деб ўтиб кетибди, кейин қарасам ҳамма-ҳамма пулларини қуёшда ёйиб, қуритяпти…».
Қутқарув операцияси иштирокчиси:
«Сув жуда кучли вайронкор кучга эга эди — бетон блокларни қандай ирғитиб ташлаганини кўринг. Йўлни шунчаки ювиб юборган. Икки кун ухламадик. Кеча (шанба куни), бу ерга қўшимча куч, одамлар келди, шунда бироз ухлаб олдим».
Ҳуқуқни муҳофаза қилиш органи ходими:
«Қутқаришга улгурилмаган айримлар томларда ўтирган экан. Ходимлар бошлиққа у томонда одамлар томда ўтирганини маълум қилди. Бошлиқ вертолёт жўнатди, фотосуратларда кўрдингиз — шунақаси ҳам бўлди. Одамларни қутқариб олиб келишди, учувчилар эса яна борайлик, деб ёниб турибди-да — яна учиб, яна қолиб кетган одамларни кўрдик. Қутқарилмаган ҳеч ким қолмади».
Изоҳ (0)