Россияда смартфон-танк — iPhone Т-34 тақдим этилди

Россияда Иккинчи жаҳон урушида эришилган ғалабанинг 75 йиллиги муносабати билан янги Caviar коллекцияси тақдим этилди, деб хабар беради IХBТ.

Флагман смартфонларини ғаройиб версияга айлантириши билан танилган Россиянинг Caviar бренди Иккинчи жаҳон урушида эришилган ғалабага 75 йил тўлиши муносабати билан янги iPhone 11 Pro Pobeda коллекциясини тақдим этди.

Коллекциядан тўртта модель ўрин олган. Улар орасида Т-34 танки услубида яратилган iPhone 11 Pro ҳам мавжуд. Смартфон корпуси титандан ишланган бўлиб, у лазер ёрдамида безатилган. Таъкидланишича, қурилманинг рельеф шакли афсонавий танкнинг ташқи кўриниши ва конструкторлик хусусиятларини такрорлайди. Бу турдаги модель нархи 319 минг рубль (4100 доллар)дан бошланади.

iPhone 11 Pro «Офицерлар» модели эса 309 минг рубль туради. Уни яратишда «Офицерлар» фильмидаги кадрлардан фойдаланилган бўлиб, қурилма корпусига «Шундай бир касб бор — Ватанни ҳимоя қилиш» иқтибоси ёзиб қўйилган. iPhone 11 Pro «Москвани ҳимоя қиламиз» моделига тилларанг кўринишдаги Кремль тасвири туширилган бўлиб, унинг нархи 337 минг рубль (4300 доллар).

Моделлар орасида энг қиммати — iPhone 11 Pro СССР бўлиб, унинг нархи 349 минг рубль (4500 доллар)ни ташкил этади. Смартфон корпуси титандан ишланган ва қора рангдаги табиий тимсоҳ териси билан қопланган. Орқа панели 999 пробали олтин билан қопланган СССР гербининг рельефи ўрнатилган. Корпуснинг пастки қисмига лазер ёрдамида урушдан кейинги мадҳиянинг сўзлари битилган.

Барча моделлар чекланган миқдорда — 75 нусхада ишлаб чиқарилган.