Қозоғистоннинг Туркистон вилояти ҳокими Умрзоқ Шукеев ва Қозоғистон сув хўжалиги соҳасининг мутахассислари Мақтаарал туманида юз берган сув тошқини масаласини муҳокама қилиш учун Сирдарё вилоятига жўнаб кетди.
“Zakon.kz”нинг хабар беришича, бу ҳақда Туркистон вилояти ҳокимининг ўринбосари Сакен Калкаманов брифингда маълум қилган. Унинг сўзларига кўра, ишчи гуруҳ тегишли вазирликлар вакиллари билан учрашувлар ва музокаралар ўтказади.
«Махсус гуруҳ Ўзбекистон сув хўжалиги вазири Шавкат Ҳамроев ва Сирдарё вилояти раҳбарияти билан музокаралар ўтказади. Умуман олганда, ушбу ҳолат ҳар икки мамлакат ҳукумати билан биргаликда муҳокама қилинади ва ҳал этилади. Сўнгги маълумотларга кўра, ҳудудга 300 миллион кубометр сув кириб келган.
Бундай йирик ҳажмлар биринчи марта қайд этилмоқда. Ҳозирча ҳеч қандай хавф йўқ, деб айтишга жуда эрта. Ўзбекистон томонидан сув оқими ҳали қайси йўналишда келиши номаълум, чунки қўшни давлат билан ҳозирги вазият ҳақида маълумот алмашиш тизимлаштирилмаган», — деб таъкидлаган Сакен Калкаманов.
Шунингдек, хабарда айтилишича, айни пайтда ҳудуддаги Фирдавсий қишлоғи тўлиқ сув остида қолган, Мирзакент қишлоғини тўлиқ сув босмаслиги учун тўғон қурилмоқда. Бундан ташқари, Мақтаарал туманида сув тошқини юз бериши мумкин бўлган яна 7 та аҳоли пункти аниқланган.
Эслатиб ўтамиз, Сардоба сув омборидаги сув тошқини оқибатида Қозоғистоннинг Туркистон вилояти Мақтаарал тумани ҳудудида техноген хусусиятга эга фавқулодда ҳолат эълон қилинганди. Вилоятнинг 5 мингдан ортиқ қишлоқ аҳолиси эвакуация қилинган. Қозоғистон расмийлари Ўзбекистон сув хўжалиги вазири сув оқими тўхтаганини таъкидлагани, бироқ сув оқими келиши тўхтамаётгани ва яна бир қишлоқ сув остида қолганини маълум қилган.
Мавзуга доир: Фото: Сардобадаги тошқиннинг фазодан кўриниши
Изоҳ (0)