Ўзбекистон Мудофаа вазирлиги таркибидаги округлар, жумладан, Марказий ҳарбий округ қўшинларида хизмат қилаётган ҳарбий хизматчилар ҳам сув тошқини оқибатида жабрланган сирдарёликларга кўмак бериш мақсадида Сардоба туманига етиб келди. Бу ҳақда «Дарё»га ҳарбий журналист Ғайрат Мадраҳимов маълум қилди.
Хабар берилишича, 2 май куни округ қўмондонлиги бошчилигида етиб келган 2000 нафардан зиёд ҳарбий хизматчи «Қўрғонтепа» ва «Софлик» маҳалласидаги кенг кўламли ишларга жалб қилинган. Шунингдек, округ тасарруфидаги 200 га яқин ҳарбий техника табиий офат оқибатларини бартараф этишда ишлатилмоқда. Бунинг натижасида аксарият оилалар ўз уйларига қайта бошлади.
Жиззах, Самарқанд ҳамда Каттақўрғон гарнизонларидан ташриф буюрган ҳарбий хизматчилар эрталаб соат 06:00 да 22:00 га қадар уйларни қайта таъмирлаш, сув чиқариш, йўлларни очиш ва бошқа ишларга кўнгилли равишда ёрдам берган.
Бундан ташқари, округ радиацион кимёвий биологик муҳофаза бўлинмалари, психологлар ҳамда тиббиёт пункти ходимлари томонидан аҳоли саломатлиги текширилиб, фуқаролар вақтинча жойлашган жойлар дезинфекция қилинган.
Эслатиб ўтамиз, Сирдарёда 1 май, жума куни, тонгда Сардоба сув омбори тўғони пикетларидан бирининг ёрилиб кетиши оқибатида сув тошқини юз берган; 2 май тонгги ҳолатига кўра, 70 мингга яқин аҳоли хавфсиз ҳудудга кўчирилган, камида 56 киши турли тан жароҳатлари билан касалхоналарга ётқизилган.
Изоҳ (0)