Қашқадарё вилоятининг Косон туманида яшовчи аҳоли карантин пайтида яшаб турган уйи бузилаётганидан шикоят қилган. Уларнинг айтишича, жорий йил 27 апрель куни ҳудудга бульдозер «борган» ва улар яшаётган уйни бузишга ҳаракат қилган.
Воқеалар тафсилотини ўрганган «Дарё» мухбири Отабек Қўлдошевнинг ёзишича, туманнинг Гулбоғ қишлоғи ҳудудидаги аҳоли яшаган нотурар жой 2018 йил тадбиркор томонидан сотиб олинган бўлиб, айни кунда тадбиркор ҳудудда қурилиш ишларини бошлашни ният қилган ва аҳоли билан муаммо келиб чиққан.
«15 йилдан бери шу ерда яшаб келамиз. 1987 йил бизни Деҳқонобод туманидан мажбурлаб кўчириб келишган ва ҳудудни ўзлаштиришимиз айтилган. Ўтган 15 йил давомида туман ҳокимлиги ва масъул ташкилотларга мурожаат қилиб, яшаб турган уйимизга эгалик ҳуқуқи берилишини сўрадик. Аммо шу пайтга қадар ҳужжат қилиб беришмади. Бугунги кунга келиб эса, 15 йил яшаган уйимиздан ҳайдаб чиқаришмоқчи», — дейди мурожаатчи Маҳмаражаб Шарипов.
«Карантинда қаерга чиқамиз, кимнинг уйига борамиз. Шунча пайтдан бери шу ерда яшаб келгандик. Уйимизга эгалик ҳуқуқини оламиз деб анча ҳаракат қилдик. Аммо ҳужжат қилиб беришмади, энди эса ҳеч ким биз ҳақимизда ўйлаб кўрмаяпти», — дейди шу хонадонларда яшовчи фуқаролардан яна бири Назокат Жўраева.
Шикоятчиларнинг маълум қилишича, 1987—1988 йиллар давомида Деҳқонобод туманининг Бойқўрғон, Ғинжак қишлоқларида яшовчи 50-60 та хонадон вакиллари ушбу ҳудудга кўчириб келинган ва уй-жой қилиб берилган. Ана шундай хонадонларнинг бештаси уй-жой йўқлигидан маиший хизмат уйига жойлаштирилган.
Шу ерда яшашни бошлаган аҳоли йиллар давомида маиший хизмат уйи атрофида ўзбошимчалик билан турар жойлар ҳам қурган.
Косон туманининг собиқ ҳокими Бахтиёр Ражабовнинг 2018 йил мурожаатчиларга ёзган жавоб хатидан англашилишича, мазкур маиший хизмат уйи 1985 йил қуриб битказилган бўлиб, эгалик ҳуқуқи 2011 йил «Сирож ўғли Беҳзод» фермер хўжалигига берилган. 2018 йил 7 сентябрь куни фермер хўжалиги раҳбари ҳамда тадбиркор Ренат Юсупов келишувига кўра бино тадбиркор ихтиёрига ўтган.
«Мен мазкур бинони 2018 йил сотиб олганман ва шу жойдан болалар боғчаси қуриш учун давлатдан кредит олдим. Вақтим кетяпти. Қурилиш қилишим керак. Шу боис ҳам маиший хизмат уйида яшовчи аҳолига вазиятни тушунтириб, чиқиб кетишлари лозимлигини айтдим. Аммо улар тушунишни истамаяпти», — дейди тадбиркор Ренат Юсупов.
Маълум бўлишича, жорий йил 27 апрель куни тадбиркор ёллаган ишчилар ва техника ҳудуддаги эски биноларни суриб, қурилиш учун жой очиш ҳаракатига тушган. Буни кўрган аҳоли эса, уйи бузилишидан қўрқиб, тадбиркорга эътироз билдирган. Қаршилик кўрсатган, ҳатто туман ҳокимлигига қўнғироқ қилиб, масъулларни огоҳлантирган.
«Менга қўнғироқ қилиб ‘уйимизни бузишяпти’ дейишгач, барча ишларимни ташлаб, воқеа жойига етиб келдим. Келсам, вазият аҳоли ваҳима қилганчалик эмас. Тўғри, тадбиркор қурилиш ишларини бошлайман деб ҳаракатга тушган. Аммо шунга қарамасдан карантин пайтида одамлар яшаб турган уйнинг бузилишига йўл қўймаймиз. Тадбиркорга ҳам тушунтиряпмиз», — дейди Косон тумани ҳокими ўринбосари Собир Эшов.
Ҳоким ўринбосарининг маълумот беришича, мазкур муаммо беш йилдан бери давом этиб келмоқда.
«Маиший хизмат уйида яшовчиларга беш йил илгари вазият тушунтирилиб, бино шахсий мулк эканлиги айтилган. Ҳатто уй қуриш учун ер участка ҳам таклиф қилинган. Аммо улар ‘уй қуришга қурбимиз етмайди’ деб, бу ердан чиқиб кетишни истамаяпти», — дейди туман ҳокими ўринбосари.
«Тадбиркорнинг пули бўлса, қаровсиз ва ташландиқ ерни обод қилиб, боғча қурсин. Нега биз яшаб турган жойга ёпишади. Биз ҳам неча йилдирки, умид билан шу ерда яшаб келяпмиз. Энди қаерга чиқиб кетамиз», — дейди аҳоли вакилларидан яна бири Фотима Қаршиева.
Маиший хизмат уйида яшовчи аҳолининг айтишича, улар кўчиб келган пайт уй қаровсиз ҳолатда бўлган.
«Кўчиб келганимиздан сўнг, атрофни ободонлаштирдик. Имкон қадар яшаш учун шарт-шароит яратдик. Агар ўша пайтда биз келиб, бу ерга эгалик қилмаганимизда бугунги кунга келиб, маиший хизмат уйининг ‘аҳволига маймунлар йиғларди’, талон-торож бўларди», — дейди Маҳмаражаб Шарипов.
«Дарё» мухбири билан суҳбатлашган аҳоли вакилларидан яна бири — Малика Тўлаганованинг айтишича, ўғли Шавкат Тўлагановнинг шарт-шароити жуда оғир. Агар улар яшаб турган уйидан чиқариб юборилса, кўчада қолиши тайин.
«Ҳеч ким кўчада қолмайди. Бешта хонадоннинг иккитасига тадбиркорнинг ўзи ҳомийлик қилиб, уй-жой қилиб беришини айтган. Қолган учта оилага эса ер берамиз. Уй қуриб олишади. Тадбиркор уларга ҳам цемент, шифер каби қурилиш материалларини бераман деган. Ҳокимлик ер берса, тадбиркор қурилиш материлларини берса, уй қуриш учун меҳнат қилиш қолади, холос, — дейди туман ҳокими ўринбосари Собир Эшов.
Аҳоли эса мазкур ҳолатдан ҳам норози.
«Қачонки, уйимиз битиб, тайёр ҳолатга келгач, бу ерни тарк этамиз, унгача бизга зарар беришмасин», — дейди Малика Тўлаганова.
Аҳоли вакиллари билан суҳбатлашган ҳоким ўринбосари Собир Эшов карантин пайтида ҳеч ким уларни безовта қилмаслигини яна бир бор таъкидлаб, карантиндан сўнг ҳокимлик томонидан бериладиган ерда уй қуриш ҳаракатини бошлаши лозимлигини тушунтирди.
Изоҳ (0)